Fin di siman pasa partido RAIZ a reacciona riba un comunicado di MEP caminda nos partido, a base di un carta di Departamento di Finansa dirigi na informador, a trece padilanti cu e presupuesto 2018 di pais Aruba lo bay tin un deficit financiero di 195 miyon florin. RAIZ a cuestiona e ponencia aki di MEP bisando entre otro cu “semper ora di traha presupuesto ta cuminsa cu montantenan y deficit grandi manera esun di 195 miyon florin y cu despues trabao di gobierno ta pa kies en deel, pues pa dicidi kico por y kico no por a base di prioridad”. Segun partido RAIZ e procedura aki ainda no a wordo efectua pa presupuesto 2018. Sinembargo e ponencia aki ta no ta cuadra cu e realidad, ya cu e ehercicio pa reduci e deficit financiero 2018 a cuminsa algun tempo pasa caba door di Departamento di Finansa, ya cu ta nan ta e instancia gubernamental cu tin un bista total di unda por corta of laga di corta den e presupuesto di pais Aruba.
Deficit inicial di 310 miyon florin
Pa informacion di e dirigentenan di RAIZ, na prome instante caba Departamento di Finansa a constata cu e presupuesto 2018 (“wenselijkheidsbegroting”) lo bay tin un deficit astronomico di 310 miyon florin! Hecho ta cu despues di hopi esfuerso pa corta drasticamente den e montante aki, nan a logra reduci e deficit te na 195 miyon florin. Adhunto nos por mira un tabel caminda ta indica na kico y di cuanto e 195 miyon florin di deficit 2018 ta consisti. Consecuentemente no tin espacio mas pa sigui corta den e deficit aki. Pues e famoso ‘kale kip’ a ser pluma completamente caba y awor e plumanan ta wordo tira como herencia den scochi di e gobierno nobo y pa asina nan wak ki milager nan lo mester bay haci cu e caha di gobierno cu ta completamente bashi caba y cu pata pata di debe. Mirando e tabel adhunto, MEP ta curioso pa haya sa di partido RAIZ si nan ta na fabor pa no paga mas pa e proyectonan PPP, pa sigui corta den contribucion di gobierno na AZV, sigui corta den subsidio na e fundacionnan social of sigui cu e proceso pa bende e patrimonio di FMSA y p’asina logra toch na baha e deficit di 195 miyon florin?
RAIZ na defensa di Bermudez
Tambe partido RAIZ den forma sorprendente a sali na defensa di ex-minister Bermudez bisando cu “ta awor e proceso di e presupuesto ta andando y cu no tin motibo pa panico (?)”. Mas aleu nan ta bisa “cu e forma con sr. Bermudez ta conduciendo e proceso di presupuesto aki ta integro y corecto (?)”. Pero con RAIZ por papia di un proceso integro y corecto, siendo cu e minister cu nan ta defende awe ciegamente no a cumpli cu e palabracion haci cu CAFT, caminda e presupuesto 2018 mester a ser entrega prome cu 1 di September 2017 y trata den Parlamento prome cu 15 di December 2017? Y no bin cu e excusa fofo cu debi na e eleccion di 22 di oktober 2017 e minister aki no kier a entrega e presupuesto prome cu dia 1 di September 2017, ya cu e lider di AVP Mike Eman mes tabata convenci cu su partido lo saca 15 asiento, pues cu ta nan mes lo bay ta den gobierno. Anto pakico ex-minister Bermudez no a haci lo corecto door di dal bay y entrega e presupuesto manera e fecha stipula di 1 di September 2017? Awor e ta laba su man y ta laga na e gobierno nobo busca entradanan adicional y corta gastonan den e presupuesto 2018 y p’asina por yega na e surplus di 0.5%!
Finalmente, papiando di integro y corecto, con nos mester cataloga e actitud di un minister di Finansa cu durante e periodo di e eleccion ultimo no a percura pa cuida e caha di gobierno debidamente y a laga tur e bagamunderianan di contractnan na compinchinan politico pasa bao di su nanishi y nunca a interveni pa para e derochamento di placa di pueblo aki? Hecho ta cu muy pronto nos lo mira e consecuencia di su tolerancia pa cu malgastamento di placa di pueblo den e presupuesto supletorio 2017!