Aruba ta sinti e aire fresco di cambio
Despues di a tuma e tempo necesario pa pone e programanan di campaña di e tres partidonan cu lo forma un gobierno nobo, studia cada punto profundamente pa asina yega na un programa di gobernacion stabiel, e momento historico a yega na unda cu e programa di gobernacion “Hunto Pa Aruba” a wordo firma na pia di Hooiberg diaranzon atardi treciendo tambe e promesa di un aire fresco pa nos país. Formador di e gobierno nobo, sra Evelyn Wever-Croes a splica mas tocante esaki:
“Den e proceso pa forma un gobierno stabiel y duradero, partidonan MEP, POR y RED a pone nan programa di vision hunto. A tuma tempo pa discuti y analisa cada punto pa asina yega na palabracionnan concreto pa brinda pueblo un bon gobierno cu lo trece un aire fresco di cambio pa nos pueblo.
Den e Programa di Gobernacion tin e puntonan cu nos lo concentra riba nan durante nos gobernacion pa atende temanan financiero cua ta un desafio hopi grandi. Nos lo atende e tema di integridad pa trece bek confianza di comunidad den gobernacion y pone e ser humano central atrobe entre otro temanan.
E Programa di Gobernacion aki ta carga aprobacion di tur tres partido pa cua motibo tambe nan a bin hunto pa den un ambiente di aire fresco di nos naturalesa firma dicho acuerdo y duna realse na e importancia y seriedad cu e gobierno aki lo traha e siguiente 4 añanan nos dilanti.
Den e siguiente fase lo bay organisa e diferente ministerionan y lo cuminsa cu reparticion di carteranan. Unabes cu nos yega na e fase aki, Partidonan ta bay bek den nan seno pa palabracionnan kende lo bira candidatonan pa minister y despues lo sigui e proceso di screening”.