Home Local Den competencia na Boneiro Atletanan di Special Olympics a gana 6 medaya...

Den competencia na Boneiro Atletanan di Special Olympics a gana 6 medaya den Dutch Caribbean Special Olympics

SHARE

ORANJESTAD, Aruba: Den e fin di siman di 28 te cu 30 di October Aruba tabata representa pa 4 atleta di Special Olympics den e Dutch Caribbean Special Olympics. A tene e competencia na Boneiro pa prome biaha. Digicel Aruba y e organisacion di Special Olympics ta contento cu e resultado di e atletanan. Un total di 6 medaya 2 atleta a gana den atletismo.

E atleta André Geerman a gana medaya di brons den sprint 80m den 12.20, medaya di brons den salto largo cu un distancia di 3.27m y medaya di plata den kogelstoten cu bala di softball ora el a tira un distancia di 39.05m. Michael Berry tambe a gana 3 medaya un medaya di oro den sprint 80m den 11.70, medaya di oro den salto largo di 4.01m y medaya di brons den kogelstoten di 35.20m. A tene un extra evento di 5x80m den Relay cu nan a participa den dje.

Aruba tambe a participa den bolas cu 2 atleta. E competencia di bolas tabata hopi fuerte y e atletanan no por a logra gana den e categoria aki. E atletanan a disfruta nan mes y tabata honra di representa Aruba den e competencia di Dutch Caribbean Special Olympics.

Na e regreso di e atletanan, coachnan, Arthuro “Tuyo” Werleman y Jeanette “Tante Nette” Williams, nan famia a ricibi nan cu un caluroso bon bini, kendenan tabata contento cu e resultado di e atletanan. Digicel Aruba ta gradici e atletanan pa representa Aruba den e competencia di Dutch Caribbean Special Olympics na Boneiro.

“Ta importante pa sostene nos atletanan di Special Olympics den nan buskeda. Pa henter un aña largo nan a train p’e oportunidad aki, cu ta caminda p’e 2019 World Games na Abu Dhabi, United Arab Emirates y nos kier manda nan cu nos bon deseonan. E acuerdo di Digicel Aruba cu Special Olympics ta uno cu ta yena nos cu orguyo sabiendo cu nos ta representa p’e talentoso atletanan aki”, asina Wanda Broeksema, CEO di Digicel Aruba a elabora. Recientemente Digicel Aruba a renoba nan sponsor cu Special Olympics.

Digicel ta un compania di comunicacion total y proveedor di entretenimento cu ta opera den 31 mercado den Caribe, America Central y Ocean Pacifico. Tambe Digicel ta anfitrion di iniciativanan comunitario rond di e mercadonan den cual nan ta opera, cu ta  inclui Fundacion di Digicel na Haiti, Jamaica, Papua New Guinea y Trinidad y Tobago cu ta enfoca riba educacional, cultura y programanan social di desaroyo. Bishita www.digicelgroup.com pa mas informacion.