E fabricante di autonan Porsche y Meadow Walker, yiu di Paul Walker, a yega na un acuerdo pa cera e demanda relaciona cu e circumstancianan cu Walker a fayece na 2013, asina Los Angeles Times a bisa awe.
Abogado di Meadow Walker, Jeff Milam, a confirma awe cu e denuncia di e supuesto morto pa motibo di negligencia a wordo finalmente soluciona “pa satisface tur esnan envolvi”.
E dia eynan Paul Walker tawata den e auto como pasahero, hunto cu su amigo Roger Rodas, ora cu nan a accidenta den e Porsche Carrera GT ariba un velocidad di 128 pa 150 kilometer pa ora 30 di november 2013 na Valencia California.
Ambos ocupante a fayece den e accidente.
Paul Walker tawata tin 40 aña momento di su morto y manera tur hende sa tawata e star den e exitoso action movie Fast & Furious.
E demanda di su yiu, na 2015, ta convenci cu su tata lo a sobrevivi e accidente pero cu ela fayece door di e keda pega den e auto momento cu seatbelt no kier a los.
Pa awor, niun hende sa detayes concreto di e agreement firma entre Meadow Walker y Porsche.
Anteriormente, Meadow a yega na un pacto cu e herederonan di Rodas, e chauffeur di e Porsche accidenta, caminda cu Meadow a haya un suma di 10.1 miyon di dollar.
Di otro banda, hues a rechasa un demanda na april 2016 contra di Porsche presenta pa viuda di Rodas, cu tawata claim cu e auto a bin cu defectonan for di fabrica.
