Prome señal di cambio Parlamentarionan di MEP a huramenta

Diabierna ultimo Parlamento a huramenta e 21 candidatonan nobo, entre nan 9 candidato di MEP cu ta Evelyn Wever-Croes, Xiomara Ruiz-Maduro, Glenbert Croes, Dangui Oduber, Rocco Tjon,  Chris Romero, Hendrik Tevreden, Guillfred Besaril y Daphne Lejuez.
Cada un a luci hopi y tabata hopi optimista

Ta trata aki di e constalacion transitorio di e Parlamento, mientras ta keda cla cu formacion. Despues di esey y cu algun candidato sali di Parlamento, MEP lo defini kennan ta bai den gobierno y kennan ta keda den Parlamento. Eynan lo tene cuenta mas tanto cu ta posibel, cu e palabracion di esnan cu mas voto ta drenta Parlamento.

“Mi ta sumamente orguyoso di e equipo di MEP cu a huramenta awe. Sigur combina cu esnan cu mester drenta ainda una bes cu nos keda cla cu formacion. Nan ta jong, nan ta profesional, studia y prepara den varios ramo, y nan tin interes general di Aruba na pecho. Mi ta convenci cu den man di e equipo aki, nos lo hiba Parlamento na e sigiente nivel”, Evelyn Wever-Croes a declara.