Y riba dje AVP no a percura pa esaki wordo entrega pa wordo aproba dia 15 di december venidero
Partido MEP a ricibi for di Informador documentonan di e situacion financiero di nos pais cu ta indica un deficit di casi 200 miyon florin. Cual sigur tawata un sorpersa pa Partido MEP aunke cu nos tawata na hultura cu e situacion financiero di nos pais no ta mucho bon.
Lider di MEP, sra Evelyn Wever-Croes, contestando e pregunta cu si realmente esaki tawata un sorpresa pa Partido MEP, saliendo for di e punto di bista cu pa 4 aña MEP a wak e desaroyo di e situacion aki y kendenan mester wordo teni responsabel pa esaki, y informando pueblo constantemente riba esaki, a bisa lo siguiente:
“Nos tawata na hultura cu e situacion financiero ta hopi malo por lo tanto esaki no tawata un sorpresa pa nos. Sinembargo e suma si tawata un sorpresa grandi pa nos.
E presupuesto di e aña 2018 mester tawata tin un surplus di 25 miyon florin segun e ley di CFT cu Mike Eman y su gobierno mes a bin cu n’e. Sinembargo, esaki no tawata e caso. Pa yega e meta aki ya caba ta algo dificil cu lo mester a haci hopi ahuste pa yega na dje.
Sinembargo, Gobierno di AVP a laga un buraco financiero di casi 200 miyon cual ta e prome reto cu un gobierno nobo ta sinta cu n’e. E di dos reto ta cu e presupuesto no ta entraga ainda y e mester a wordo entrega dia 1 september y e mester wordo aproba pa Parlamento pa dia 15 di december proximo. Y AVP no a mira e nececidad pa haci esaki.
E ley pa entrega e presupuesto dia 15 di December ta un ley nobo cu a bin door di CFT cu AVP mes a bin cu n’e pero nan mes no a cumpli cu n’e ni tene cuenta cu n’e.
Esakinan ta otro circumstancia cu ta complica e comienso di un gobierno di coalicion. Pero no ta imposibel. Pa cuminsa, ta importante pa nos haci un “quick scan” pa sa unda realmente nos ta para financieramente, informa comunidad di e resultado di esaki y di aki nos lo sigui traha riba nos plannan di solucion cu nos ta desea pa nos pais. Aruba lo conoce un gobierno serio, firme y duradero cu lo tin e vision y determinacion mutuo pa sanea nos situacion financiero”.