Home Politics MEP: Partido AVP a laga un buraco di 195 miyon den presupuesto...

MEP: Partido AVP a laga un buraco di 195 miyon den presupuesto di nos pais.

SHARE

Esaki ta e reto di mas grandi pa un gobierno nobo

E conbersacionnan cu Informador, mr. Arie Swaen ta terminando y awo ta prepara pa e siguiente fase, cu ta e formacion di Gobierno nobo. Lider di MEP, sra Evelyn Wever-Croes ta elabora riba esaki:

“Den 20 aña, esaki ta e prome biaha cu Aruba ta bolbe pasa den un situacion asina aki na unda cu mester forma un gobierno di coalicion. Y aki e rol di prensa ta hopi importante. Y mi ta haci un apelacion na prensa pa atende cu esaki na un manera cauteloso, cu prudencia y cu mas transparencia posibel y no troce cosnan cu ta wordo bisa pa no stroba e proceso aki cu pueblo a pidi p’e. E disponibilidad di e tres partidonan tey pa forma gobierno di coalicion cu un base amplio.

Nos a haya un pakete di informacion cuanan ta documentonan cu a wordo entrega na Informador, cu ta encera documentonan financiero y di fondo di pension entre otro. Inclui tambe tin un carta di Direktie Financien cu ta mustra e realidad financiero cu nos ta den.

Ya caba pais Aruba mester tin su presupuesto entrega na Parlamento segun ley di CFT cu Gabinete Mike Eman a bin cu ne. Cual presupuesto 2018 mester a duna un surplus di 0.5 porciento cu ta ekivalente na 25 miyon florin.

Financien ta splica cu for di e documentonan cu nan ta posee, ta mustra un deficit di 195 miyon florin. Esaki ta un buraco financiero basta grandi den nos presupuesto.cu e gobierno nobo lo ereda. Esaki ta un di e retonan grandi cu tin nos dilanti.

E retonan no ta solamente cu partidonan cu no a traha cu otro den pasado awor mester bay traha hunto. E retonan no ta cu mester bay defini prioridadnan di cada partido cu lo bay traha hunto. Pero e reto di mas grandi ta cu mester atende cu e realidad financiero cu ta hopi mas serio cu loke nos a pensa e ta.

Nos tawata na haltura cu e presupuesto no tawata entrega na Parlamento. Nos tawata sa cu den ley di CFT cu gobierno di Mike Eman mes a bin cu ne, ta poni cu e presupuesto mester wordo aproba pa Parlamento pa dia 15 di December y cu un surplus di 25 miyon cu ya tawata dificil caba pa yega, pero nos no tawata sa cu tin un deficit asina grandi.

E reto aki indudablemente ta bay cambia e scenario pero lo no cambio nos desponibilidad, locual nos a informa e Informador tambe. Sabiendo esaki y cu nos ta conta cu cooperacion di tur departamento pa nos traha riba esaki y riba otro retonan di nos pais, nos ta dispuesto pa move pa e siguiente fase”, sra Evelyn Wever-Croes ta bisa.