Aruba ta duna inicio oficial na Siman di Lantamento di
Awe ta duna inicio na e di 7 edicion di e Siman di Lantamento di Mucha aki na Aruba. E aña aki esaki lo tuma lugar cuminsando 15 di november te cu 29 di november 2024.
White Yellow Playful Geometric Blank A4 Document Landscape – 1
Desde 2016 Aruba tin un Comision Vision Pedagogico cu tin como meta pa formula y promove e Vision Pedagogico na Aruba. E comision aki ta consisti di 5 organisacion cu un nan tarea principal ta pa sostene mayor : Departamento di Asunto Social, Fundacion Pa Nos Muchanan, Stg. Wit Gele Kruis Aruba, Fundacion Respeta Mi y Tienda di Educacion. E organisacionnan aki conhuntamente cu 30 otro organisacionnan den tereno social ta forma parti di e Plataforma Vision Pedagogico y nan ta traha duro pa ofrece diferente servicionan pa sostene mayornan y famianan na Aruba durante henter aña.
Desde 2018 a introduci na Aruba e Siman di Lantamento di Mucha. Gobierno a scohe e siman aki door cu e ta inclui e fecha 20 di november cu ta “Dia Internacional di Derecho di Mucha”. Aruba ta uni su mes na e causa aki y ta enfatisa riba e importancia di algun puntonan importante pa lantamento di mucha: Ban lanta nos muchanan den (1) un ambiente di amor y seguridad, (2) ban ofrece apoyo positivo, (3) guia y pasa tempo hunto cu nos yiunan. Pa mayornan por (4) brinda un disciplina positivo y prome cu tur cos, pa nan (5) corda cuida nan mes como mayor y como persona y (6) busca sosten ora tin mester
Ta importante pa nos muchanan y nan famia ta na altura di derechonan di mucha y e 6 puntonan basico pa cada mayor por lanta nan yiu den un hogar cu amor, cariño y respet. E siguridad y bienestar di nos mucha- y hobennan ta responsibilidad di nos tur.
Desde awe tin diferente actividad, tanto pa mayor como pa nos muchanan di Aruba. E calendario di actividad ta posibel danki na e diferente organisacionnan cu ta promove e vision pedagogico y e derechonan di mucha na Aruba.
Nos kier recorda mayornan cu nos como instancianan semper t’ey pa brinda tur sosten y ayudo na mayornan cu ta desea esaki. Pa cualkier pregunta pa sosten pa mayor con pa lanta yiu por tuma contacto cu: Tienda di Educacion na #161 (gratis) of na Fundacion pa Nos Muchanan na #5880856