Representantenan di organisacionnan di tur e seis islanan di Hulanda Caribense y di Ministerio di Asuntonan Interno y Relacion di Reino (BZK) tabata di 4 te cu 6 di november na Sint Eustatius pa e di dos “Integrity Summit Dutch Caribbean 2024”. Meta di e cumbre tabata pa siña di otro y intercambia conocemento. Participantenan a brasa e idea pa lanta un oficina Hulanda Caribense pa promocion di integridad, pa suminstra knowhow y experticio na e islanan. Ta bay studia e posibilidad pa lanta un oficina asina.
E parti mas importante
“Integridad mester ta para central cerca tur miembro di nos comunidadnan, pa cuminsa cerca organisacionnan gubernamental”, Alida Francis, gezaghebber di Sint Eustatius a declara, durante su discurso inaugural.
Segun Francis tabata di gran importancia pa organisa e cumbre aki, pa desaroyo di e topico aki na Sint Eustatius pa duna un impulso na e diferente actividadnan cu tin plania e añanan benidero. Recientemente a lanta un oficina di integridad na Sint Eustatius cu lo bay facilita tambe un programa di entrenamento amplio pa gobierno local.
Durante e cumbre di integridad participantenan a profundisa riba topiconan specifico. Tabatin hopi topico riba agenda, manera promocion di un cultura conciente di integridad, trahamento cu analisis di riesgo y conseheronan confiabel.
Miho practica
E enfasis tabata riba experticio interno. Funcionarionan di integridad experencia di diferente isla a comparti nan conocemento, miho practicanan y lesnan cu a siña.
Ministerio di BZK a facilita e cumbre na Sint Eustatius, den colaboracion cu SRA-Caribbean & Partners NV, un oficina local specialisa den entrenamento y asesoramento riba tereno di integridad y cumplimento, y Nyenrode Business Universiteit.
E participante- y organisadonan ta desea di sigui cu un agenda comun. “Nos ta realisa cu capacidad operacional ta limita riba e islanan. Pero no mester inventa maneho y structura di nobo. Mas colaboracion por ta efectivo y por empodera e islanan.”
Premio di integridad
A duna atencion special na e trabou di Jeaninne Wong-Loi-Sing, consehero di integridad na Rijksdienst Caribisch Nederland (RCN). Riba 14 di oktober 2024 Wong-Loi-Sing a ricibi e Premio di Integridad Ien Dales (Ien Dales Integrity Award) 2024. Na Hulanda ta otorga e premio prestigioso aki na personanan cu ta haci esfuerso extraordinario pa promove integridad den e sector publico. Wong-Loi-Sing a comparti su experiencia cu participantenan na e cumbre na Sint Eustatius.
Balor agrega
Participantenan tabata di acuerdo cu lantamento di un oficina Hulanda Caribense pa promove integridad tin un balor agrega. E oficina aki lo yuda e islanan inventarisa posibilidadnan di entrenamento, desaroya un campaña di conscientisacion, compila e miho practicanan y organisa sesionnan di promocion di expertisio. BZK a ofrese pa contrata un lider di proyecto pa sigui desaroya e idea aki.