ORANJESTAD, Aruba 6 di November 2024 – Parlamentario di Fraccion di MEP, Sr. Ricky Hoek, a asisti recientemente na inauguracion di e Departamento di Mucha y Hoben, un proyecto vital cu a surgi for di e Sociaal Crisis Plan implementa den 2017.
For di eynan, Gabinete Wever-Croes I a sigui traha pa fortifica e area social na e isla. Awe por wak un bunita proyecto caminda Departamento di Mucha y Hoben a keda realisa y cu tambe por conta cu su propio localidad, Hoek a expresa.
El a sigui bisa cu esaki tin un base firme den e area social caminda cu ta bay brinda seguridad, ayudo y sosten na mucha y na mayornan, pero tambe e profesionalnan cu ta traha den e area social.
“Den Parlamento, nos semper a sostene e tipo di proyectonan aki,” el a agrega, subrayando cu e Fraccion di MEP a contribui firmemente na e esfuerzo pa realisa esaki, bao Gobinete Wever-Croes I y II. “Esakinan ta inversionnan di miyones di florin, cu sin duda lo traha pa garantisa e seguridad pa nos muchanan, hobennan y famianan Arubiano,” Hoek a splica.
Pa cera su mensahe, Hoek a expresa su aprecio y palabranan di felicitacion pa tur e miembronan di e ekipo y profesionalnan cu a dedica pa realisa e proyecto, deseando nan hopi exito den e labor di fortifica e seguridad pa e famianan y muchanan di Aruba.