Cu sosten financiero di Aruba Lions Club
ORANJESTAD, Aruba: Minister di Salud Publico, Cuido di Nos Grandinan y Deporte, Dr. Carlos “Alex” Schwengle ta hopi orguyoso di yega na e Plataforma Promocion di Salud. E plataforma ta un sorto di dialogo social y a crea esaki den salubridad. E stakeholders grandi ta den dje y e ta pa trece unidad den con pa trece informacion. E enfoke ta riba e promocion di salud.
Antes por a mira cu pa ora di sali duna informacion, dokter di cas ta conta e storia un tiki diferente, specialista un tiki diferente, nurse tambe ta conta un tiki diferente, di cual na dado momento e cliente ta confundi di kico e ta exactamente y ta kibra confiansa di e clientenan pa cu e sistema. A dicidi di cambia e sistema aki y pa tur traha hunto. A acorda con ta bay duna, di ki forma y di kico e contenido mester ta den e informacion cu ta suministra pa promocion di salud. Esaki ta un di e proyectonan, pero tin mas.
E prome version di e foldernan di diabetes tabata un iniciativa di Wit Gele Kruis di hopi tempo pasa. Ministerio di Salud Publico ta hopi gradicido cu Aruba Lions Club, kende a yuda financieramente pa por a ehecuta e produccion di e brochure aki. “Masha danki y pabien. Danki na e plataforma”, el a duna di conoce. E plataforma aki ta pa y di pueblo aunke cu ta nos gabinete a forma esaki. Un beneficio di e plataforma ta cu e ta un “klankbord”, door cu nan ta ey fo y si acaso tin un preocupacion cu no a haya atencion di Minister, nan por documenta esaki pe Minister. Tambe por pone un recomendacion na dje y duna Minister. E por funciona como un organo di conseho, pasobra nan ta hendenan cu ta traha den e industria di cuido y ta haci un bon trabou. Minister ta orguyoso di tur partner, di Directie Volksgezondheid, di Wit Gele Kruis y un danki di curason na Aruba Lions Club cu a duna sosten financiero pa pusha duro pe producto aki.
Ta un lastima di mira cu hendenan ta biba un bida no suficiente saludabel pa decenanan largo, unda por mira cu e peso ta hunga un factor importante. Hopi hende ta puntra kico ta e factornan cu ta duna diabetes. E parti genetico ta hunga un rol, unda tin famianan cu tin mas diabetes cu otro pero e bariga grandi ta un di e factornan. Hendenan cu tin sobrepeso, specialmente cu bariga, tin hopi chens di bira resistente pa insulina. Esey hopi biaha ta e tipo 2 cu ta papia di dje.
E cantidad di clientenan cu diabetes a aumenta aki na Aruba, cu ta un “punt prevalentie” di 17% di diabetes y ta calcula cu esaki ta 20 mil hende. Esaki ta relata na e sobrepeso cu tin riba Aruba, p’esey e prevencion primario ta esun di mas importante cu ta biba y come saludabel unda cu tur prevencion t’ey. E informacionnan duna via tur partner di e plataforma lo bay riba Facebook y websitenan di DVG, Wit Gele Kruis y AZV den formato digital. Ta promove e informacionnan di diabetes riba Facebook pa informa cu un hende por ta hoben, pero por haya diabetes dependiendo di e material genetico cu e persona por tin y e estilo di bida cu un hende ta hiba. Den e 9 brochurenan e tin tur sorto di informacion con por cambia e estilo di bida y por preveni pa haya diabetes. Tambe den e brochure ta splica e sintomanan cu por ta un indicacion cu un hende por tin sucu.