E falta di capacidad di señora Evelyn Wever-Croes pa negocia cu Hulanda ta preocupante. E obviamente no ta compronde e reglanan cu partidonan mester respeta ora nan ta negocia.
Pa cuminsa bo mester sa kico bo mes kier ora bo bay negocia. Pero, ora ta trata di supervision financiero señora Evelyn simplemente no sa kico e kier. Na 2015 e tabata completamente contra cualkier tipo di supervision financiero, sin importa si ta den Rijkswet of den un Landsverordening. Hasta el a instiga hende pa bay manifesta, para wanta sla pa evita supervision financiero den un Landsverordening. Na 2020 el a bolter y dia 13 di november 2020 el a firma pa entre otro Landspakket, primitiendo Hulanda pa zorg pa supervision financiero den un Rijkswet.
E di dos regla importante ta cu ora bo ta negocia bo mester ta di buena fe. Si bo ta palabra algo, bo mester tin e intencion pa cumpli. En cambio señora Evelyn a priminti Hulanda pa colabora cu supervision financiero den un Rijkswet, pero na momento di cumpli el a mustra un otro cara. El a nenga di colabora cu e Rijkswet scondiendo tras di e 11 parlamentario cu ta sostene gobierno. Esey tabata un acto di mala fe cu ta daña e imagen di Aruba.
E di tres regla ta cu autonomia ta encera cu bo ta liber pa negocia e contenido di e palabracion. Ta hustamente e libertad aki ta haci bo responsabel pa e contenido di bo palabracion. Si despues bo ta mira cu Sint Maarten y Curaçao a negocia miho cu bo, esey ta completamente bo mesun culpa. Aruba a negocia cu Hulanda pa haya un prestamo di corto plazo di 916 miyon florin na 0% interes (cero prociento). Tambe a palabra cu prome cu e prestamo lo a caduca 31 di augustus 2023 lo a bolbe negocia cu Hulanda. En todo caso Hulando lo a refinancia e prestamo na un interes cu ta cuadra cu loke Aruba merece a base di su reputacion financiero internacional (alrededor di 6.9% pa un prestamo di 20 aña). Hulanda a demostra di ta dispuesto pa cumpli cabalmente cu e palabracion aki, pero ora señora Evelyn a mira cu Sint Maarten a haya 3.4% y Curaçao a haya 5.1% di interes el a bira jaloers. El a cuminsa hunga victima, yorando cu Hulanda no ta husto. Esey ta un berguensa pa Aruba.
E di cuater regla di negociacion ta cu partidonan mag di cambia e palabracionnan, siempre en cuando e otro partido ta bay di acuerdo cu cualkier cambio. P’esey si bo kier cambia e contract, bo mester ta dispuesto pa ofrece cambionan cu e otro tambe kier. Den e caso aki Hulanda tabata kier pa hancra supervision financiero den un Rijkswet, pasobra Hulanda tin experiencia desde 1993 cu tur minister-presidentnan di Aruba ta gusta firma protocol, pero no ta gusta cumpli cu palabracionnan. Alabes Hulanda sa cu Aruba tabata kier un interes mas abao, pasobra esey lo crea mas espacio financiero pa Aruba. A base di e consideracionnan aki Hulanda a ofrece un interes similar na esun cu Hulanda mes ta gosa di dje riba mercado di capital internacional a cambio di hancra supervision den un Rijkswet. Señora Evelyn no tabata capaz pa mira cu esey tabata un bon deal.
Es mas, na momento cu Hulanda kier e Rijkswet señora Evelyn mester a analisa nos pasado cu Hulanda. Desde 1986 Aruba a hiba un administracion financiero desastroso. Pa drecha esaki Aruba a haci yen palabracion cu Hulanda sin nunca cumpli cu nan. E situacion ta empobreciendo nos mesun pueblo y pa colmo e situacion a bin ta empeora. E deficit riba presupuesto a yega na Afl. 111 miyon na 2010, pa entre 2011 y 2014 e deficit a aumenta na un promedio di Afl. 300 miyon pa aña. Ta p’esey Hulanda a bin cu supervision financiero y danki na e presion di Hulanda nos maneho financiero tiki tiki a cuminsa mehora. Esey ta nifica cu pa drecha nos maneho financiero, Hulanda ta un aliado. Es mas, e enemigo di nos finansas publico y di nos cartera ta den nos mesun cas. P’esey señora Evelyn mester a acepta e oferta di Hulanda, exigiendo mas ayudo pa drecha finansas publico, exigiendo cu Aruba ta mantene e flexibilidad necesario pa goberna e pais na un manera responsabel y un clausula con pa termina e Rijkswet.
Sin embargo señora Evelyn a nenga e deal. A manda e minister di Finansas, señora Xiomara Maduro, pa firma un contract di 20 aña na un interes di 6.9% sin ningun palanca (leverage) pa negocia cu Hulanda. Awe Aruba ta bay bek Hulanda cu rabo meymey di pia, aceptando e deal cu Hulanda a ofrece na prome instancia. Si Hulanda djis tabata kier a gana placa riba lomba di Aruba, e lo a laga e contract di 6,9% manera e ta. Mientras tanto henter e negociacion ta bisa Hulanda si cu Aruba no ta capaz di negocia pa su mes, ni pa reconoce loke a bay malo desde 1986 y mucho menos pa drecha e situacion cu Henny, Nel y Mike a crea. Es mas, Hulanda ta mira cu tur e politiconan aki ta gaña pueblo sin misericordia. P’esey Hulanda a dicidi pa sumes cuminsa duna conferencia di prensa pa informa pueblo debidamente, hasta den Papiamento.
Enfin, señora Evelyn Wever-Croes ta falta capacidad necesario y p’esey awe nos no por dun’e nos confiansa mas tampoco. Nos mester recobra nos autonomia door di hiba bon gobernacion. Finalmente nos mester caba cu nepotismo y corupcion prome cu nos cuminsa deshaci di e ultimo pistanan di colonialismo di Hulanda.