Hooiberg – Diaranson anochi poco pabou di Hooiberg Supermarket ta sosode un accidente serio di trafico.
Mirando cu tawata trata di un accidente frontal serio y cu varios persona herida mesora a despacha e unidadnan di rescate di Brandweer y tambe ambulancenan.
Polis mientrastanto ta yega na e sitio y ta constata cu tin tres herido y tur ta hende homber.
Alabes ta mira tambe cu ta trata di un accidente frontal, entre un Hyundai Accent preto y un Mitsubishi Lancer.
Bomberonan na yegada mester a drenta den accion pa libera un persona cu a keda pega den e Lancer. Mientras e otro victimanan Paramediconan hunto cu polis tawata sacanan y ponenan ariba brancard pa despues sali direccion Hospitaal.
Testigonan a conta cu e Mitsubishi Lancer a yega bira sin duna preferencia dilanti e Hyundai Accent, causando un impacto frontal hopi fuerte.
Caminda mester a wordo cera den ambos banda, pa e unidadnan di rescate por a haci nan trabou.
Polisnan di trafico a presenta pa asina cuminsa nan investigacion. Slachtofferhulp tambe lo a wordo poni na altura pa e accidente serio aki.
E area aki ta uno conoci pa accidentenan di trafico serio, te hasta cu final fatal den pasado.
