Apreciabel Patrick,
Durante e programa di Enfoke dia 4 di maart 2024 abo a dirigi bo mes na mi persona bisando cu ami a faya bo cu mi a vota “voor” riba e Invoeringsverordening Wetboek van Strafvordering, puntrando si mi sa kico mi a vota eynan. Tambe bo a pidi mi publicamente pa mi splica pakico mi a vota “voor” e Invoeringsverordening riba dia 4 di maart ultimo. Cu mil amor mi ta splica bo esaki.
Mi lo aprecia, si bo ta comparti e carta ki cu e seguidornan di Enfoke. Hunto cu mi splicacion mi ta manda bo e ley di Strafvordering vigente y esun nobo. Si bo lesa pa bo mes, lo bo ripara cu Gerlien a gaña abo y Speed y pueblo henter. Corda cu ora ami ta papia, mi ta papia cu prueba y conocemento. Ora ami ta vota, mi ta vota cu consenshi y consciencia.
Riba dia 4 di maart ultimo mi a vota “voor” pa e introduccion riba den april 2024 di e ley cu Professor de Doelder a prepara, pasobra un voto pro e introduccion di e ley ki ta un voto:
pro mehoracion di e derechonan di victima,
pro combati criminalidad y
pro mehoracion di derecho di detenido.
Gerlien a gaña na Enfoke cu segun ley vigente e detenido ta pasa den un cel na Warda di Polis un maximo di 10 dia. Esey ta un mentira, pasobra e ley vigente ta permiti pa wanta un detenido un maximo di 26 dia den un cel na Warda di Polis. E Wetboek van Strafvordering ta permiti un detenido pasa tanto su 2 + 8 dia di inverzekeringstelling como su 8 + 8 dia di bewaring na Warda di Polis (lesa articulonan 87 y 93 di e Wetboek van Strafvordering vigente).
E ley nobo ta limita detencion den un cel na Warda di Polis na un maximo di 3 + 3 dia. Esey kiermen cu e ley nobo ta baha e maximo di 26 dia na Warda di Polis te na 6 dia. Segun e ley nobo (lesa articulonan 93 y 94 di e Wetboek van Strafvordering nobo) e bewaring ta baha na 14 dia y mester tuma luga na Huis van Bewaring.
Gerlien a bisa repetidamente durante boso programa cu minister mester a stel uit e introduccion di e ley nobo en bes di introduci 20 dia na Warda di Polis. Esey ta contene dos mentira den un, pasobra:
e ley nobo ta introduci exigencia di maximo 6 dia na Warda di Polis, y
minister di Husticia a uza un Nota di Cambio pa crea un uitstel temporario di e regla nobo di inverzekeringstelling y bewaring pa motibonan logistico.
Pa duna su argumento algun peso, Gerlien ta zwaai cu un carta di Orde van Advocaten cu ta pidi Staten pa no aproba e Nota di Cambio di minister. Ta parce cu Gerlien y e abogadonan a haya nan titulo di “Meester” den un cahita di Cracker Jack. Pasobra, Constitucion ta duna gobierno e derecho exclusivo di cambia un proyecto di ley cu gobierno ta presenta na parlamento, te ora cu parlamento ta aproba of rechasa e ley. E Nota di Cambio ta bira parti integral di e proyecto di ley (lesa articulo V.5 inciso 1 di nos Staatsregeling). E carta di Orde van Advocaten ta un berguensa pa abogacia na Aruba, pasobra e ta demostra
cu Orde no ta compronde e proceso legislativo manera e ta hancra den nos Constitucion y
cu Orde no a compronde kico e Nota di Cambio ta encera ni kico su consecuencianan ta.
Un voto contra e Invoeringsverordening Wetboek van Strafvordering ta un voto contra derechonan humano fundamental.
Patrick, bo mes sa cu no ta prome biaha mi ta critica estupidez di abogado, manera dia cu mi a critica Geoffrey Wever pa su “Carta habri” na Mike Eman, bisando cu e presuncion di inocencia “ta conta pa cualkier hende den nos comunidad”, pero no pa Benny Sevinger. Tambe mi a critica Dello Gomez pa su locura cu Ministerio Publico no por persigui Besaril pa actonan cometi na Hulanda. Ata caso Tulipan.
Cada hende ta capaz pa papia y skirbi locura, tambe abogadonan y hendenan cu tin mas skol cu hopi hende pareu. P’esey e ta hopi importante pa keda critico y pa hende lesa pa nan mes. Oposicion no kiermen cu bo ta vota contra pa ta contra. Bo ta vota pa bienestar di Pueblo. Ora Gobierno ta haci algo bon pa Pueblo, ta bo obligacion etico y moral manera parlamentario pa vota pro.
Un saludo cordial,
Ryçond do Nascimento
Parlamentario independiente