Hopi contento, gradici y orguyoso nos ta anuncia boso cu Sulima Geerman entrante 15 di april 2024 lo asumi e cargo di director nobo di Stichting Algemene Bejaardenzorg Aruba, SABA.
Cu Sulima SABA a encontra un director sumamente califica y motiva. Actualmente Sulima ainda ta traha como cluster-manager na Dr. Horacio O. Oduber Hospital na Aruba. Nos ta gradici HOH pa ta asina dispuesto pa coopera cu transicion di Sulima di su funcion na HOH pa SABA.
Prome cu Sulima a drenta servicio na HOH na 2019 el a traha pa Sanquin Plasma na Hulanda. Ey nan el a doctora na Universidad di Amsterdam, despues cu el a obtene su master den biomedical sciences. Sulima ta casa y tin 2 yiu. E ta un Rubiano lanta na Daimari.
Dos cita for di su carta di solisitud: “Esta un oportunidad unico y bunita!” y “Mi pasion ta den cuido y calidad, y e combinacion di e dosnan aki”. Nos ta spera cu boso tambe, mescos cu nos, lo keda afecta pa su entusiasmo y profesionalidad. E demanda cada biaha mas grandi pa cuido cronico na Aruba ta trece bunita retonan pa SABA.
Nos ta convenci cu Sulima ta e persona indica pa lidera e proceso di transformacion den SABA, fortificando SABA su rol importante den e cadena di cuido di adulto mayor na Aruba. Nos ta desea Sulima y boso tur hopi exito den esaki. Hunto nos ta bay traha duro y logra cosnan bunita.