Segun MEP: Chris Dammers no tin ningun conocemento di finansa publico y economia

Awor ta comprendibel e desaster financiero economico crea pa AVP!

Ta increibel tur e malinformacion y manipulacion cu ta ser treci padilanti pa e parlamentario di AVP, Chris Dammers caminda el a declara den un comunicado di prensa emiti e siman aki cu segun cifranan di Banco Central e economia Arubano ta proyecta di expande cu 3.5 % na 2017. Pero den e mesun rosea sr. Dammers no ta cita e mesun Banco Central aki cu ta bisa cu e supuesto crecemento aki pa gran parti ta depende di tur e actividadnan petrolero relaciona cu e reapertura di e refineria (blender). Sinembargo ya nos a yega caba fin di augustus y faltando solamente 4 luna mas pa aña caba, ningun hende por mira te ainda algun actividad y trabaonan grandi ta tumando lugar den e refineria, corda pa esaki aporta na algo di e crecemento economico.

Un barbaridad completo

Sinembargo locual ta increibel y un barbaridad completo ta e parti den e comunicado di Chris Dammers caminda e ta declara cu “A base di e prome kwartaal di Banco Central e proyeccion sigur pa loke ta economia di pais Aruba, por tuma nota cu esaki compara cu 2016, tin un entrada di 842.5 miyon florin mientras pa loke ta e aña aki, e ta para na 872.5 miyon”.

Riba e declaracion aki partido MEP kier a puntra dirigentenan di AVP si no tin ningun otro hende cu conocemento di finansa y economia den AVP cu lo por a conseha e parlamentario aki prome cu el a skirbi e tipo di barbaridad aki. Alavez e pregunta ta, for di unda Chris Dammers a coba e cifranan fantasma aki?

Uzando telraam Chines

E motibonan pa descualifica e cifranan treci padilanti door di Chris Dammers ta lo siguiente:

1. Dammers uzando un telraam Chines ta publica cifranan sin sa mes kico esakinan ta contene, ya cu e ta referi na entradanan di gobierno como base pa calcula e crecemento economico den un aña. Esaki pertinentemente no ta berdad ya cu realmente e crecemento economico no ta wordo calcula a base di e entradanan, pero ta wordo midi door di aumento of caida di e GDP real di un pais. Aki partido MEP ta trece un tabel padilanti caminda por mira por ehempel con na 2015 e entradanan di gobierno a crece cu 8.4%, pero e crecemento economico basa riba e GDP real a sufri un caida -0.5% na 2015. Un otro ehempel ta aña 2014 caminda e entradanan di gobierno a cay cu -2.2%, pero aki si tabata tin un crecemento economico di 0.8%. Pues e locura di Chris Dammers pa relata e crecemento economico na e entradanan di gobierno ta demostra cu e no tin ningun nocion y conocemento riba e materia aki.
2. Si sr. Dammers kier mantene su ponencia cu e entradanan di gobierno so ta instrumental pa cu e crecemento economico, anto partido MEP tin hopi mal noticia pe, ya cu den e promer kwartaal di 2017 nos a conoce un suma na entrada di gobierno di 257 miyon florin y compara cu e prome kwartaal di 2016 (280 miyon florin), esaki ta un caida cu 23 miyon florin. Pues na filingrana e ponencia ridiculo di sr. Dammers a keda, ya cu ta bisto pa un y tur cu e entradanan di gobierno no ta creciendo.

Pues partido MEP ta recomenda sr. Dammers, awor cu e ta den fase final di su carera politico, pa toch sigui un curso basico di finansa y economia y pone su mes na altura di e desgracia financiero y economico cu su partido AVP a hinca nos pais aden durante e ultimo 8 añanan y pa e proximo 27 añanan.