Ta posibel cu bo mes of algun persona cu bo conoce ta preparando pa haci compras durante ‘Black Friday’. E inicio informal di e temporada di Pasco a transforma su mes den un dia caminda e comerciantenan ta invita clientenan pa cumpra den nan tiendanan. E ta un tradicion na Merca, pero, no obstante e percepcion comun, e nomber no tin nada di haber cu e balans den ink cora of preto riba e cuentanan di e comerciantenan.
Black Friday a cuminsa na decada di 1950 na Philadelphia. Decenas di cumprado di e suburbionan a bini na e ciudad durante e dianan despues di ‘Thanksgiving’.
E tiendanan den e ciudad a lansa ofertanan grandi y decoracion, prome c’un wega di futbol entre e Ehercito y Marina, cu a tuma luga e diasabra. Polis di trafico a keda traha shiftnan di 12 ora, hende no por a sali y a inunda e aceranan, parkeerplaats y e cayanan. Polis mester a trata cu tur esaki y nan a cuminsa uza e concepto aki.
Tambe e comerciantenan di e ciudad a cuminsa uza e termino pa describi e filanan largo y e caos di e compras na nan tiendanan. El a bira un referencia comico na e centro di Philadelphia despues di ‘Thanksgiving’.
Na 1961, a propone e idea di cambia e nomber di e vacacionnan pa ‘Big Friday’ pa evita c’un di e dianan mas grandi di haci compras por a haya un connotacion negativo. Pero esaki no a tuma lugar cu exito.
Den transcurso di tempo, e comerciantenan a siña adopta e nomber y hasta a extende e evento di compras di un dia.
Rond di 2003, e orarionan di apertura di e tiendanan a crece. E aña ey, Kmart, Walmart y Sears a ofrece descuentonan prome cu manece for di 5 or di mainta of 6 or di| mainta. Esey tabata mes aña cu ‘Black Friday’ a bira e dia di compras mas rentabel di aña, segun datonan di Conseho Internacional di Centronan Comercial. Prome cu 2003, e
dianan di compras mas rentabel na Merca tabata na final di december.
Na 2011, Walmart a amplia atrobe e orarionan comercial ora nan a habri nan tiendanan 10 or di anochi riba ‘Thanksgiving’ y a keda habri te ‘Black Friday’.
Cu e popularidad di internet, un otro dia di compras a nace na 2005: Cyber Monday (Dialuna Cibernetico). E tabata un termino di marketing di e Federacion Nacional di Comerciantenan pa refleha e frenesi di cumpramento cu tiendanan fisico ta sinti riba ‘Black
Friday’. Cyber Monday a explota den fama desde e tempo ey.
Cumpradonan ta bisa cu e ofertanan y descuentonan ta e factor mas importante den nan eleccion di e tienda, sigui pa e envio gratis y un localidad conveniente.