Nepal ta prohibi TikTok pa salvaguardia ‘armonia social’

NEPAL: E Gobierno di Nepal, a anuncia un decision importante pa prohibi e popular red social TikTok, basa riba e efectonan negativo cu e aplicacion tin riba e “armonia social” di e pais.
TikTok, e plataforma popular pa comparti videonan cu ta conta cu casi 1.000 miyon di usuarionan, ta enfrenta restriccionnan den varios pais y ta wordo acusa di viola leynan relaciona cu privacidad di datonan. Ademas, tin alarma tocante e posibel efecto nocivo cu e aplicacion por tin riba hubentud.
Segun Minister di Comunicacion y Tecnologia di Informacion, Rekha Sharma, “E decision di prohibi e aplicacion a wordo tuma dialuna y autoridadnan a cuminsa traha riba temanan tecnico.” Sharma a splica cu e gobierno a tuma e decision pasobra TikTok ta wordo uza di manera sistematico pa comparti contenido cu por “perturba armonia social y afecta e structura familiar y relacionnan social.” A pesar di esaki, e funcionario no a specifica si tabatin un suceso determinante cu a yuda tuma e decision.
E prohibicion a wordo anuncia despues cu Nepal a implementa un norma cu ta obliga rednan social prohibi pa “perturba armonia social” pa establece un oficina local den e pais.
TikTok ta e di seis red social mas uza na mundo, segun informacion di agencia di mercadeo We Are Social. Nan a registra un crecemento fuerte entre publico hoben, compara cu nan competidor, Facebook y Instagram.
Diferente pais a tuma iniciativanan pa reforza e control riba e rednan social, con pa contraresta e impacto potencial cu e tecnologia por tin riba e hobennan den nan comunidad.