ORANJESTAD: Diabierna anochi, a tuma luga Premio Excelencia den Deporte 2022 unda, cu a reconoce e atletanan cu mas a destaca den nan disciplina pa aña 2022. Un anochi magico yena cu emocion y alegria unda a honra e 130 atletanan nomina, a reconoce bintishete (27) entrenado pa nan contribucion den e desaroyo di deporte di Aruba. Tambe, a rindi homenahe na dies (10) baluarte deportivo cu a dedica gran parti di nan bida na desaroyo di deporte di Aruba. Banda di esaki, a reconoce seis (6) atleta olimpico cu a ricibi un certificado y pin di Olympians for Life (OLY) for di World Olympians Association pa nan esfuerso y pa promove e balornan olimpico.
Presente na e anochi mas importante di deporte na Aruba tabata Prome Minister Evelyn Wever – Croes acompaña pa su distinguido esposo Sr. Kenneth Wever y Minister Endy Croes acompaña pa su kerida esposa Sra. Dilailah Croes. Tambe e gran anochi aki a conta cu presencia di Presidente di Parlamento mr. Edgard Vrolijk y Parlamentarionan Shailiny Tromp – Lee, Raymond Kamperveen y Alvin Molina.
E magno evento deportivo a inicia cu recorido riba e “red carpet” di e nominado-, mayor- y invitadonan special cu a tuma un potret como recuerdo di Premio Excelencia den Deporte 2022.
E anochi bunita aki a keda presenta pa e maestronan di ceremonia Sra. Sandra Croes y Sr. Andrew Vrolijk kendenan a haci un excelente trabou. E ceremonia a inicia cu un bunita presentacion di e grupo di baile NLG y NTG bou direccion di Sra. Marisol Peña. A presenta un video di e trabounan deportivo inicia y/of realisa durante aña 2022- 2023. Sigui pa discurso di Sr. Minister Endy Croes, Prome Minister di Aruba Sra. Evelyn Wever – Croes y Presidente di Comision Excelencia den Deporte 2022 Sr. Kenneth Vrolijk.
E momento mas emocionante di e anochi ta ora cu a presenta e ganadonan di Premio Excelencia 2022:
Atleta Masculino 2022
Mikel Schreuders
Atleta Femenino 2022
Kamilah Dammers
Atleta Masculino U18
Christiaan Jansen
Atleta Femenino U18
Mariajose Salazar Salazar
Atleta Masculino U13
Ocean van Loon
Atleta Femenino U13
Giovanna Wernet
Atleta Rising Star Masculino
Kailan Wouters
Atleta Rising Star Femenino
Zaria de Groot
Atleta Paralimpico
Elliot Loonstra
Atleta Special Olimpics
Mildred Every
Ekipo di Aña
Aruba Voetball Bond
Rookie of The Year Masculino
Xylan Anthony
Rookie of The Year Femenino
Ava Figaroa
Pa conclui, por a observa emocion y alegria riba cara di e atleta-, mayor- y coachnan durante e anochi special aki. E anochi a clausura cu un excelente presentacion di Ataniro Eisden cu a deleita esnan presente cu su exitoso repertorio. Minister Endy Croes ta felicita tur e nominado- y ganadonan di Premio Excelencia den Deporte 2022. Aruba ta orguyoso di boso!