Prome Minister Evelyn Wever-Croes ta na Hulanda pa atende cu varios compromiso di trabou pa e hunto cu Minister Plenipontenciario na Hulanda, señor Ady Thijsen, trata un punto di agenda den Conseho di Minister di Reino diabierna. Prome Minister a indica cu e reunion aki a bay bon na unda cu a trata e cambionan di e Ley di Supervision Financiero di Aruba, LAft. Prome Minister a duna di conoce cu esaki mester tuma luga den Conseho di Minister di Reino pa motibo cu desde 2015, e Gobierno anterior a firma un protocol cu Hulanda cu ta encera cu tur cambio den e LAft mester haya aprobacion di Conseho di Minister di Reino prome cu sigui cu nan.
Gobierno di Aruba algun luna pasa a traha riba algun cambio pa e LAft pa actualisa e normen anticua den e LAft y a manda esaki dia 31 di augustus pa BZK pa e wordo trata. Prome Minister a expresa cu Gobierno tawata tin e speransa cu e cambionan lo a wordo aproba den e reunion di diabierna den Conseho di Minister di Reino pa asina e wordo manda Parlamento pa e wordo trata prome cu e periodo di 6 siman di reces di Parlamento pa asina cambionan drenta na vigor pa 1 di januari 2024.
Sinembargo, Prome Minister a expresa, na ultimo momento, esta diamars, Hulanda a bin cu 3 condicion nobo. Diaranson Gobierno di Aruba a hiba conbersacionnan cu Secretario di Estado Alexandra van Huffelen riba e condicionnan aki. Secretario di Estado van Huffelen mes no tawata presente den e reunion di Conseho di Minister di Reino diabierna pa motibo di compromisonan na Boneiro. Presente na su luga tawata Minister di BZK, señor Hugo de Jonge cu kende tambe Prome Minister ta den contacto.
“A dicidi pa mandateer Secretario di Estado van Huffelen y Minister di Finansas pa sigui na mesa cu Gobierno di Aruba pa asina nos keda cla cu esaki den e proximo dianan y pa evita di keda warda te e siguiente reunion di Conseho di Minister dia 24 di November proximo cu lo ta mucho laat pa Aruba”, Prome Minister a indica.
“Esaki no tin nada di haber cu refinanciamento di Covid. Solamente e tin di haber cu Aruba kier cambia e normen den e ley pa asina Aruba tin su norma y ley adecua. Mi a trece padilanti cu e interes di 6,9% ta e porcentahe di mas halto cu Aruba a yega di haya, y cu nos ta haciendo tur posibel pa baha e interes aki”, Prome Minister a finalisa bisando.