Cinco hoben profesional a asumi directiva di Fundacion Digna Lacle Herrera (FDLH). Diasabra anochi durante un evento especial den aire liber na Hoya Aruba, e Directiva nobo di FDLH a keda introduci. Presidente nobo ta Ichelle Oduber-Simon, Edelysse Nicolaas secretaris, Dennerich Kelly tesorero, Wendrick Cicilia y Ildemar Kock miembronan di Directiva.
Presidente nobo di FDLH, Ichelle Oduber-Simon, a asumi e funccion cu un entusiasmo grandi y a delinea e pensamentonan cu cual e directiva nobo lo bai realisa metanan di e fundacion pa formacion di profesionalnan pa servicio publico. E fundacion a accentua cu esaki ta e momento pa e generacion nobo asumi responsabilidad pa realisa cambionan importante pa nos pais. E generacion nobo y e generacion cu experiencia mester uni pa por crea perspectiva pa e cambionan importante pa Aruba. E presidente nobo a enfatisa riba innovacion y union entre tur generacion pa Aruba ta fuerte pa atende cu e retonan. E bestuur a duna di conoce di a accepta e reto aki, pasobra tin hopi confianza den e equipo aki ; “nos tin un team nobo cu ta compromente nos mes pa sigui dilanti cu e vision di sra.
Digna y su mision pa preparacion y formacion politico pa tur cu ta interesa den sirbi nan pais, sin distincion di color politico manera semper. “Un orador invita durante e anochi importante aki tabata Profesor dr. Robertico (Tico) Croes cu a mustra riba e historia largo di AVP di semper ta traha systematicamente riba plannan y equiponan cu por atende cu e desafionan cu Aruba ta enfrenta. E a mustra cu cada tempo tin su retonan y un instituto manera FDLH tin un tarea importante pa prepara esnan cu kier contribui na sirbi e “Common Good”, E Bon Comun. Tambe Tico a mustra riba e rol legendario di Digna Lacle den historia di educacion y politica di Aruba. Profesor dr. Croes lo ta un docente tambe di un di e cursonan cu FDLH ta bai ofrece. Cu su conocemento y experiencia e lo comparti pensamentonan cu cursistanan riba e tema “Decision- Making”.
Lider di Partido AVP, mr. Mike Eman, a gradici e directiva anterior y esun nobo pa e voluntad di pone schouder bao di e trabao. “Esaki ta un instituto importante pa un Partido y un Pais por aspira di lucha pa e Bon Comun di sociedad; “e common good pa nos Pueblo y Pais”. Eman a accentua cu ningun sociedad por florece sin un formulacion comparti di e Bon Comun. Manera e escritor Amitai Etzioni a bisa,
“ta un vision asina ta provee e criterianan pa por tene na dje ora cu interesnan y valornan di varios sector di comunidad ta ranca den direccion conflictivo”.
Hustamente pesey e ta esencial di tin un vision comparti den comunidad di kico ta e Bon Comun. Mr. Mike Eman a enfatisa Digna su curason grandi pa e “Bon Comun” di nos pueblo.
Maestra di cereminia Zuleika Wever a anuncia cu pronto lo incia cu un cyclo di cursonan nobo cu lo ensera: Inleiding Staats- en Bestuursrecht; mr. Luciano Milliard; Overzicht Economie van Aruba; drs. Sharon Erasmus, Hoofdpunten Openbare Financiën en Toezicht; Inleiding in de Belastingraamwerk van Aruba; mr. Gerick Croes, Basisbeginselen Sociale Verzekeringen, Bestaanszekerheid en Gezondheid en Arbeid; mr. Carl Giel; Recht op Onderwijs; drs. Rene Herde; Decisionmaking; Profesor dr. Tico Croes; Maatschappelijke stromingen; Politieke Ideologieën en Filosofie; mr. Mike Eman.
E directiva nobo ta premira cu e animo y plannan di e Directiva di FDLH y diversificacion di e cursonan un continuidad di interes grandi pa e formacion cu lo keda ofreci. E cursonan di “basis cursus Politieke vorming”, cu normalmente FDLH ta ofrece, lo wordo amplia. E basis cursus, banda di e tema di derecho estatal, ta bai inclui tambe hopi otro ramo di interes nacional, cu un accento riba innovacion, pero basa riba fundeshi di principionan y balornan importante. Cu e energia dynamico, cu e Directiva nobo a presenta su mes, ta anticipa hopi interes pa cursonan di FDLH.