MENLO PARK , CALIFORNIA
Segun e corant Mericano Wall Street Journal, e red social Instagram ta facilitando e netwerknan di pedofiel, esaki despues di a haci un investigacion hunto cu e universidadnan di Stanford y Massachusetts Amherst, nan a studia e rednan social unda material di abuso sexual di menornan ta wordo comparti y bendi. Meta, cu ta e compania madre di Instagram, a reconoce cu no ta logrando suficiente pa combati e tipo di materialnan aki riba Instagram.
Segun e investigadornan, e algoritmo di Instagram ta trata na ofrece su usuarionan material cu nan ta haya interesante. Esaki ta crea un sistema cu ta conta cu pa e usuarionan tambe cu ta buscando imagenanan di abuso seksual di mucha, E usuarionan aki ta wordo referi di mes na otro profilenan cu tambe ta compartí imágennan similar riba instagram.
Hashtag
E investigadornan a crea un account fake pa por a conduci e investigacion aki. Segun e investigadornan especificamente hashtags ta wordo usa pa conecta otro cu e profilenan cu ta promove abuso sexual di menor of conecta otro cu profilenan pa mira potret of videonan cu ta wordo considera abuso sexual di mucha. Despues di a bishita algun di e profilenan aki, e accountnan di Instagram fake di e investigadornan a wordo bombardea cu potret, video etc. cu ta wordo considera abuso sexual di menor. Tambe nan a ricibi diferente link cu ta dirigi nan na websitenan externo caminda nan por haya material di abuso sexual di menor sea pa intercambia of cu ta wordo bendi.
Segun e investigadornan: “Instagram ta e trampolín pa yega na e sitionan riba internet unda material di abuso sexual di menornan ta wordo ofreci,”. Otro plataforma di social media tambe a wordo investiga, pero Instagram a resulta di ta e plataforma mas grandi y mas principal caminda hendenan ta topa otro pa haci negoshi of intercambia material di abuso sexual di menornan.
META
Meta a bisa cu nan ta hacienda tur cos posibel pa blokia e usuarionan y tambe elimina e materialnan aki cu ta wordo publica riba Instagram. E compania madre a forma un ekipo di trahadornan specializa pa trata na combati e problema serio aki riba Instagram. Segun Meta, den e ultimo dos aña, nan a manda como 27 red di pedofilia offline. Segun The Wall Street Journal, e trahadornan actual y anterior di Meta a informa cu e cantidad di e accountnan riba Instagram cu ta follow e profilenan cu ta promove material di abuso sexual di menor probablemente ta den miles y miles, si no ta den miyon.