“Laga bo alimento ta bo medicina, y medicina bo alimento” Hippocrates.
Actualmente nos ta trata e enfermedad cronico, siendo cu nos mester duna mas enfasis na e causante di esaki. Na Aruba e problema mas grandi den salubridad ta e falta di prioridad na con pa evita enfermedadnan cronico, por ehempel presion halto y diabetes.
Durante mi trabou actual mi a haya e oportunidad pa reconose cu na Aruba mayoria di nos hendenan, tin falta di conocimento di nan enfermedad, medicamento y mas importante con pa preveni e enfermedadnan cronico aki. Nos sistema di salubridad general ainda no duna e importancia suficiente cu e merece.
Nos cifranan di enfermedad nan cronico entre otro ta keda aumenta! Locual ta hiba na mas demanda di atencion medico cu ta aumenta nos lista di espera. Nos muchanan y hobennan na un edad jong ta padeciendo di enfermedadnan cronico caba, lo cual ta haci e situacion actual uno alarmante y no aceptabel! Esaki ta bin di e mal nutricion. Den Caribe nos ta e isla number un den sobrepeso y number dos den obesidad, unda un di e solucion pa mehora esaki ta educacion nutricional. Na Aruba actualmente no tin suficiente nutricionista y alavez no ta wordo cubri door di AZV.
Riba e imagen grafico adhunto, por mira e causa di morto na Aruba analisa for di aña 1999 te cu 2014. E color blauw ta representa e ser masculino y oranjo e ser femenino.
Kiko ta hasie dificil?
Nos ta wordo influencia door di “fast food”, cu ta mas disponibel y mas propaganda en comparacion cu cuminda saludabel.
Hopi hende na Aruba tin e concepto nan di alimentacion eronio, por ehempel e porcionnan di cada fuente di energia ta aporta den nos alimentacion diario. Hopi hende no sa e diferencianan corecto di “come pa sinti satisfecho” y “come pa nutri bo curpa”.
Con pa cuminsa
E calidad di e alimento ta sumamente importante. Actualmente tin enfermedad nan cu por wordo controla y evita por medio di alimentacion saludabel. Door di cambio estilo di bida tin e posibilidad pa reduci te elimina (den algun caso) e uso di remedinan cronicamente.
Consumi berdura y fruta fresco
Nos mester concientisa y motiva nos hendenan pa planta nan mes un berdura y frutanan.
Variacion den alimentacion ta importante, ya cu si bo come tur dia e mesun cuminda e ta bira “laf”.
Aunke e cantidad di proteina, fibra, carbohidrato y vet den hende homber y muhe ta importante, nos mester focus mas den calidad y nan priopedad curativo.
Nos mester habri caminda pa alimentonan basa riba planta unda tur esakinan tin propiedadnan terapeutico y beneficionan especifico pa nos curpa.
En corto nos mester mas nutricionista califica y capacita. Haci educacion nutricional parti di e edcuacion di nos muchanan.
Tambe ajusta e canasta basico cu mas producto saludabel. Y sin laga afo apoya y duna empuhe na nos cultivadornan di fruta, berduranan y criadornan di bestianan local.
E responsabilidad ta di cada un di nos pero tambe di salubridad publico.
E idea ta pa tur hende mantene y gosa di un bida saludabel! Locual cu sigur mester por!