ORANJESTAD – Awe mainta minister di Turismo y Salud Publico, Sr. Dangui Oduber, tabata presente na e conferencia di World Tourism Day. Desde 1980, nacionan uni a declara dia 27 di September e dia oficial di turismo na nivel global. E dia aki ta un dia pa refleha ariba turismo y e impacto social, economico y cultural cu esaki tin na nivel mundial. E tema cu a wordo escohi e aña aki ta “Rethinking Tourism”, mirando cu nos ta den un etapa crucial den e industria aki, yena cu oportunidad pa reinventa kico turismo ta significa y con nos por eleva esaki su calidad.
E siman aki lo tin diferente presentacion y conferencia tumando lugar cu un grupo diverso di expertonan di Aruba pero tambe internacional. Tin diferente hende a bin for di Europa pa asisti e “Aruba meets Europe conference”. Na e conferencia aki lo tin oportunidad pa intercambia idea y tambe pa siña for di vision y strategia di otro paisnan.
Aunke cu Aruba ta yegando su nivelnan di pre pandemia cu turismo, ora cu frontera mester a wordo sera tabata tin consequencianan pa full e industria aki. E symposium aki ta un momento pa redefini kico turismo ta significa pa Aruba y con nos kier pa e industria aki crece y ta sostenibel den futuro. E pandemia a siña nos cu turismo ta cambiando y abase di esey a crea un vision cu ta cuadra cu actualidad y e innovacionan global cu ta pasando den turismo.
Den e vision di turismo tin puntonan cardinal cu lo enfoka riba dje den e siguiente añanan. Esakinan ta turismo sostenibel, desaroyo di isla Aruba, innovacion y un isla cu ta rico den data pa por evalua y sigui hasi plan y proyecto nan pa eleva e calidad di producto Aruba y locual ta ofrece.
Turismo ta e pilar principal di Aruba su economia y e pandemia a mustra nos cu nos mester adapta nos mes continuamente y crea un modelo turistico moderno, autentico y sostenibel. Minister Oduber ta gradici tur stakeholders cu a hasi nan esfuerzo pa e evento aki, cual tabata un exito rotundo. Un danki ta bay specialmente na Aruba Tourism Authority, cu semper ta principal den fortifica relacionan y ehecuta e vision di turismo pa Aruba.
Minister Oduber kier a expresa gratitud special pa tur esnan cu ta labora den e industria. Danki pa boso contribucion, compromiso y trabou duro. Bosonan ta e asset di mas grandi pa nos turismo.
