Un di e peso financiero grandi cu un compania tin, ta e salario di su empleadonan. E situacion financiero economico cu nos ta den actualmente, tin influencia cu empleadonan cu solicita pa un empleo no tur ora ta haya 40 ora di trabou pa siman. E orario di trabou semanal cu cierto companianan ta ofrese ta mayoria di biaha entre 25 pa 35 ora. E grupo di empleadonan cu ta traha menos di 40 ora pa siman ta wordo yama “part timers”. Como cu consumidornan a bin ta hasi compras cuateloso, ta crea e situacion cu benta na companianan a bira menos. Menos benta ta menos entrada, cual cu ta guia e companianan pa tuma part timers den servicio. E motibo cu companianan a bin ta tuma e decision aki, ta pa nan ta mas sigur di por lo menos break- even pa luna y no bay core cu perdida.
Actualmente e salario minimo ta Afl 1.719,54 mensual, Afl 401,- semanal. Despues cu un empleado cumpli cu su premienan (esta AOV, AZV y pension general) y ricibi reparatietoeslag, e persona ta bin cu ne mensual mas of menos Afl. 1.650,- netto den su man. Den comunicado di CBS di mei 2017 a bin dilanti cu e bestaansminimum (costo di bida mensual) pa un persona adulto ta Afl 2.056,-. A base di e bestaansminimum y e salario minimo, por mira cu tin un diferencia di mas of menos Afl 406,- mensual pa un persona adulto por cumpli cu tur su debernan. Pa un persona adulto y cu un yui, e diferencia entre salario minimo y bestaansminimum lo ta mas grandi.
Un empleado cu ta gana salario minimo y ta traha 40 ora pa siman, ta gana un suma di Afl 10,- pa ora. Como cu un part timer ta traha entre 25 pa 35 ora di trabou semanal y cu un suma di Afl 10,- pa ora, su salario mensual lo ta:
| Orario pa siman | Salario mensual |
| 25 | Afl 1082,50 |
| 35 | Afl 1515,50 |
E salario mensual di un part timer sin kita premienan cu nan mester cumpli cu nan.
Apesar cu un part-timer no ta haya un salario minimo mensual, e persona aki no ta bin na remarke pa haya e reparatietoeslag. Pa un empleado haya reparatietoeslag riba su salario, e mester tin un salario minimo di Afl. 1.636,69 mensual. E situacion menciona ta hasi e diferencia entre salario di un part timer y bestaansminimum mas grandi. E diferencia entre “salario minimo / salario di part timer” y bestaansminimum, tin su influencia negativo riba e calidad di bida. Tanto economico y socialmente. E diferencia entre “salario minimo / salario di part timer” y bestaansminimum, ta obliga cuidadanonan (cu salario minimo / part timer) di traha mas cu un trabou pa nan por cubri cu nan debernan. Y si e situacion presenta cu nan no por haya un otro empleo pa traha extra, ta ki otro ta di spera? Door di tin cu traha mas ora di trabou, ta hasi cu nan tin menos ora pa nan yui(nan). Menos ora cu nan yui ta menos comunicacion y supervision pa nan yui. Door di “no tin / menos” comunicacion y supervision pa e hoben, como mayor bo no tin informacion di con e formacion di bo yui ta desaroya. Bo no sa:
- cu ken e ta anda;
- kico e ta hasi;
- kico ta pasa cu ne.
E falta di comunicacion y supervision tin su efecto negativo pa su formacion social y e confiansa entre mayor y yui. Un hoben cu ta bin ta desaroya den un ambiente cu falta di comunicacion y supervision, ta un hoben vulnerabel pa cay den e caminda robes. Esey ta hasi cu e situacion financiero economico ta comberti den problema social y den criminalidad, unda cu pueblo engeneral lo sinti e efecto.
Pa por brinda miho calidad di bida pa sania e situacion cu mester traha mas cu un trabou, mester introduci mas pilarnan economico. Dos pilar economico cu POR lo introduci ta:
- expande turismo pa medio di fast ferry entre e islanan Aruba, Boneiro y Corsou;
- Fourth Industrial Revolution.
Pa medio di mas pilar economico ta bay tin mas empleo cu miho salario. Door di tin mas cuidadano cu miho salario ta hasi cu e benta na companianan lo mehora. Na mesun momento gobierno ta bay tin mas entreda pa medio di impuestonan cu empleado y companianan mester cumpli cu nan. Locual cu ta e parti financiero, POR lo reforma e impuesto di directo pa indirecto. Reforma di impuesto directo pa indirecto ta un base mas amplio y husto, den e sentido cu esnan cu awe no ta contrubui lo cuminsa contrubui. E combinacion entre reforma fiscal y miho economia, ta crea un miho situacion financiero. Door di un miho situacion financiero, tin e oportunidad pa brinda un aumento di e salario minimo y cuminsa traha riba e diferencia mensual entre e salario minimo y bestaansminimum.
Pa evita cu hobennan ta keda keda sin supervision lo introduci un programa di enseñansa despues di ora di scol cu lo sostene e curiculo basico. Cual cu lo tin influencia positivo den e formacion di e hobennan, y ta limita e oprtunidad pa tuma e caminda robes.