Cumpliendo cu e responsabilidad constitucional di entrega Presupuesto na tempo
Diahuebs mainta 1 di september, Minister di Finansa y Cultura Sra. Xiomara Maduro tabata na Parlamento di Aruba pa asina entrega Presupuesto 2023 na Presidente di Parlamento Sr. Edgar Vrolijk den presencia di Griffier Sr. Herman Hek. E mandatario encarga cu finansa publico a trece dilanti cu ta un dia special como Minister di Finansa cumpli cu e responsabilidad prescirbi den nos Constitucion pa entrega Presupuesto 2023 di Pais Aruba na tempo, esta riba 1 di september di e aña previo. E presupuesto a wordo entrega den forma digital na Presidente di Parlamento Sr. Edgar Vrolijk. Ademas di cumpli cu e deber como mandatario encarga cu finansa, ta duna Parlamento e tempo necesario pa por studia e presupuesto y bay pa su debate. Cu e cambio di aña, Pais Aruba lo por drenta aña 2023 cu su presupuesto na ordo.
Minister Xiomara Maduro ta trece dilanti cu esaki ta un trabao di ekipo pa cual e ta gradici di curazon Departamento di Finansa, Departamento di Legislacion, demas departamento, colega ministernan di Gabinete Wever-Croes II, coordinadornan di presupuesto di cada ministerio, y tur hende cu a contribui pa por logra e dia special aki. Awe dia 1 di september, despues di 15 aña, Gobierno di Aruba ta cumpli atrobe conforme nos Constitucion. Presupuesto 2023 tin un entrada di 1532 miyon florin, gasto di 1557 miyon florin, un necesidad financiero di 1414 miyon florin y un deficit financiero di 25 miyon florin, cual ta 0.4% di nos GDP. Durante un conferencia di prensa Minister a splica den detaye pa locual ta e Presupuesto 2023. E mandatario a haci un apelacion na Presidente di Parlamento Sr. Vrolijk pa inicia e proceso di tratamento di Presupuesto 2023.
