Diamars anochi mi a keda completamente babuca despues cu mi a wak un video di Marisol Lopez Tromp cu ta circulando riba Facebook. Den e video aki Marisol ta papia di e condicion di Bubali Plas y RWZI. E ta menciona con preocupa e ta pa e coralnan, beachnan, turista, localnan y lo demas. E ta menciona cu mester di upgrade, mantene y mehora RWZI mientras cu tin un musica di suspenso ta toca den background. Hopi bunita e video ta, pero e contenido no ta refleha ni pa un seconde loke fraccion di MAS ta para pe. Y ta netamente esaki ta e motibo di e articulo aki, pasobra como representantenan di pueblo nos mester ta critico pero sigur no gañado ni manipulado. Specialmente ora cu fraccion di MAS su accionan di pasado recien ta grita totalmente opuesto di e contenido di practicamente henter e video publica.
- Durante di e reunion publico di Carmabi 31 di Januari 2022 mi a presenta un mocion den Parlamento den cual a urgi coleganan pa aproba lo siguiente; 1- Pa urgi gobierno bin cu un meerjarenplan structural di mantencion pa tur tres planta di RWZI, specialmente esun di Bubali Plas. 2- Pa aloca fondonan necesario den begroting pa asina por realisa e inversionan necesario pa mantene structuralmente tur tres planta di RWZI. Marisol y sra. Gunn a vota contra di esaki, y awor kier pretende di kier salvaguardia Aruba di e situacion na RWZI. Esaki nos ta yama hipocrecia maximo!
- Marisol: “Minister President a sconde rapport pa Parlamento y pa pueblo.” Esaki tampoco ta berdad. Como Parlamentario y representante di pueblo ma bay den sala di Parlamento cerca director di DNM cu a bisami cu e personalmente a duna ex-minister Marisol un presentacion di e draft di Carmabi Rapport den su oficina! Kiermen, Marisol tabata sa di e rapport, no a actua ni haci nada (atrobe) cu e situacion alaramante di RWZI, y despues kier grita den Parlamento cu a sconde rapport p’e mientras e a wak e prome cu nos tur! Ademas, e rapport di DNM a conseha gobierno den punto 5.3: “Gefaseerd publicatie van de Carmabi Rapport aan publiek”. Esaki a sosode asina mes! Atrobe Marisol kier a hunga un wega politico y bisa cu gobierno ta sconde rapport pa pueblo! Esaki nos ta yama un comportacion bergonsoso y gañamento.com.
- Tempo Marisol tabata den Parlamento den constelacion di AVP, nunca a worry cu RWZI pa hopi aña. A inverti 1 miyon so den 8 aña. Awor Gobierno a laga traha rapport Carmabi, ta siguiendo conseho di expertonan y ta invertiendo miyones. Ki Marisol a haci ora e tabata por? Nada!
Marisol a aproba e presupuestonan desastroso y e djodjomento di AVP den gobierno. Ta 60 miyon so tabata tin mester pa cumpra un planta nobo pa RWZI, pero Marisol y AVP nunca a wak e planta di RWZI como un prioridad. Awor cu Rapport Carmabi a bin, e ta preocupa! Increibel! Ainda tin hopi mas prueba di e gañamento constante di Marisol, pero pa aworaki nos ta lag’e te akinan pa pueblo mes husga. Adhunto tur documento pa pueblo por wak tur e pruebanan!
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!
