ORANJESTAD – Hopi lo puntra kico un brug tin di haber cu un miho calidad di bida pa e ciudadanonan di Aruba. “Tur cos,” Minister di Infrastructura Benny Sevinger a bisa na momento cu el a presencia e ultimo trabounan cu ta wordo haci riba e brug nobo di Green Corridor.
Den fin di e siman aki a pone e base pa e brug y a basha azeta. Diabierna mainta a cuminsa pa pone e ultimo capa di asfalt, cu ta cubri e caminda di e brug. “Na momento cu esaki tabata tumando luga, a bin den mente historia di nos pais. Para aki nos por mira tres generacion di brug,” Sevinger a conta. El a papia di e brug mas pazuid (di Spaanslagoen) cu a wordo construi na 1929 door di Isaac Wagemaker, cual a conecta e parti pariba y pabou. Hopi añanan despues a construi e otro brug (cu semper a wordo yama brug nobo) cu a trece un desaroyo nobo pa San Nicolas. “Awor tin un brug nobo cu lo trece un desaroyo hopi mas grandi pa pariba di brug, alabes treciendo mas siguridad den trafico, cu mi colega di husticia Arthur Dowers ta papia hopi di dje. Emocion ta yena bo curpa ora mira cu un pais ta avansado cu tempo y cu e Gobierno aki sigur cu a dicidi cu ta padilanti nos mester bay y a bini cu proyectonan cu ta trece un cambio grandi den bida di nos ciudadanonan”. E ta un alivio tanto pa esnan cu ta biba pariba como pabou di brug y cu tur dia mester trafica den e area aki.
E mandatario a splica cu e ampliacion di e caretera cu ta pasa via di e brug di Green Corridor, ta bay reduci e tempo cu e chauffeurnan ta keda pega den trafico den oranan di mainta y atardi. E tempo cu nan ta resta awor ta tempo cu nan por dedica na nan famia, comparti mas tempo di calidad cu nan sernan keri. “E ta mas cu un proyecto di infrastructura. E ta trece un desaroyo cu nos ta duna un calidad di bida na tur ciudadano cu ta biba aki bay ariba, treciendo klinkers dilanti nan cas, walkway, ta bay bin parke, fietspad, etc. E no ta simplemente un caminda cu ta conecta un parti di Aruba cu e otro, pero e ta un desaroyo completo pa e comunidad.”
Sevinger a gradici Prome Minister Mike Eman, kende ta pusha cerca tur hende pa e proyectonan aki keda cla, pasobra e ta algo grandi pa nos pais y algo grandi den bida di e ciudadanonan di Aruba.