BACKGROUND
E comienzo di e era espacial pa humanidad ta marca riba April 12, “Dia Internacional di Vuelonan Espacial Tripula”, cual fecha ta reafirma e papel vital di technologia y ciencia espacial pa logra cumpli cu obhetivonan di desaroyo sostenibel y pa aumenta e bienestar di naciones y pueblonan.
E dia aki tambe ta sirbi pa sensibilisa nos mundo pa asegura cu ta cumpli cu e aspiracion di reserva espacio ultraterrestre pa finnan pacifico, persevera den esfuerzo pa tur nacion por goza di e benificionan deriva di actividadnan den espacio y pa mantene espacio como patrimonio comun pa henter humanidad.
Riba e dia aki numeroso museo espacial, centronan cientifico, y skolnan ta organiza actividadnan especial, dedica na educa e publico tocante exploracion espacial. Exhibicionan, seminario y discusionan especial ta resalta con exploracion espacial tin e potencial di uni humanidad.
Tawata Union Sovietica cu na 1957 a lanza e promer satelite crea pa ser humano y pone den orbita “Sputnik I”. Riba April 12, 1961, Yuri Gagarin a haci e promer vuelo espacial tripula, ora e la orbita Tera den e nave espacial Vostok 1.
E momentonan historico aki a habri e caminda pa exploracion espacial na benificio di henter humanidad.
Den un resolucion adopta April 7, 2011, Asamblea General di Naciones Uni a designa April 12 como Dia Internacional di Vuelonan Espacial Tripula.
E fascinacion genuino di publico cu espacio ta amplio y e curiosidad aki den hende rond mundo ta contribui na paz mundial.
Exploracion espacial ta provee conocimento clave di e historia di nos sistema solar. Sin exploracion espacial lo nos no tin satelitenan den orbita. Eakinan ta asisti nos cu comunicacion global, seguridad y nabegacion aereo, terrestre y maritimo. Sin satelite lo no tawata tin GPS.
Satelitenan por yuda meteorologonan pronostica tempo. Ademas satelite y technologia satelital ta hunga un papel crucial den actividadnan di observacion di Tera for di espacio, cual por yuda pa monitor, compronde y adverti nos riba potencial desasternan natural, contaminacion di oceano, factornan cu ta contribui na cambio climatico y salud di oceano y su ecosistemanan, vigila areanan grandi marino proteha, monitorea pesca ilegal y traficacion ilegal di droga, asisti cu investigacion cientifico di biologia marino y na final tambe ta esencial pa agricultura, por ehempel den monitorea awa dushi.
E United Nations Office for Outer Space Affairs (UNOOSA) ta e organo di Naciones Uni responsabel pa cooperacion internacional den usonan pacifico di espacio ultratrerrestre. Cu su programa United Nations Platform for Space-based Information for Disaster Management and Emergency Response, e ta propone pa tur pais y organisacion internacional y regional tin acceso na y desaroya e capacidad pa usa tur tipo di informacion espacial pa sosten di tur aspecto di maneho integral di calamidad.
ARUBA, RIBA MAPA DI EXPLORACION ESPACIAL
Nos pais, con chikito cu e por ta, a produci den pasado y keto bay ta produciendo profesionalnan sumamente talentoso, cu ta destacando nan mes den technologia y ciencia espacial.
Nos tur conoce Dr. Edward Cheung, trahando pa NASA, cu por cierto a pone mundo academico internacional tuma nota di e talentonan academico di origen Arubano.
Edward Cheung cu tin un grado Ph.D. den electrical engineering di Yale University, a bira conoci ora e y su team a logra scapa e Hubble Telescope dor di diseña e ASCS/NCS Relay Unit Breaker Assembly (A.R.U.B.A.) yama asina na honor di su pais di origen.
Edward Cheung a specializa den robotica cortesia di un beca (scholarship) di NASA y Phillips Electronics y tambe tin diferente inventonan patenta riba su nomber.
Pa su logronan ela ser otorga e Condecoracion Real di Ridder in de Orde van de Nederlandse Leeuw.
Den un entrevista recien unda e la elabora riba su trabou actual pa e sistema JPSS-2, den cual entrevista e la duna di conoce cu pa cualkier Arubano talentoso cu tambe kier drenta e filanan di NASA, e lo ta mas cu dispuesto pa ta nan mentor.
Pero nos tin hopi mas talento, hobennan activo den e ramo di technologia y ciencia espacial.
Na 2019 nos a ser sorprendi cu e grato noticia cu tres hoben studiante Arubiano na TU Delft, esta Jillian Oduber, Claudia Sweerts y Roderick Tapia a participa den e proyecto pa desaroya e “moon rover” Zebro pa ser usa riba Luna. Zebro ta e vehiculo mas chikito diseña pa explora un cuerpo espacial pafor di Tera.
Y finalmente nos tin cu menciona Ademir Vrolijk, yiu homber di nos Suplente Gobernador di Aruba.
Ademir Vrolijk ta studiando actualmente pa obtene su Ph.D. na George Washington University.
E tin un trayectoria impresionante caba como academico y nos mester menciona cu e la scirbi hunto cu diferente otro autor varios “Guidebooks on Small Satellite Programs” pa United Nations Technical Subcommittee on the Peaceful Uses of Outer Space, European Space Agency (ESA) y pa UNOOSA mes
E PAPEL DI AGENCIA ESPACIAL NACIONAL DEN DIVERSIFICACION DI ACTIVIDAD ECONOMICO
Den un articulo den MIT Technology Review di November 26, 2019, titula “SPACE. There has never been a better time to start a smal space agency” ta destaca cu awor mas cu nunca hasta pais chikito por probecha di cambio drastico, entre otro den e acceso na compania comercial pa lanza satelite, y technologia di miniaturisacion di satelite cu awendia nos tin small satellites, micro satellites y nano satellites, technologia espacial ta yega na alcance di paisnan chikito.
Satelite chikito por ser usa pa investigacion cientifico y actividadnan di monitoreo di Tera for di espacio.
Tin un escala creciente di aplicacion di particularmente micro satelite y nano satelite, y diseño di technologia pa satelite y actividadnan di control via centronan di control satelital ta un mercado creciente pa cual nos isla tin un potencial di probecha plenamente di nos talentonan Arubiano den e ramo.
Trintidos anja pasa a funda Stichting Internationale Teleport Aruba (International Teleport Aruba Foundation) cu e meta pa studia con telecomunicacion avanza y infrastructura digital por contribui na crea sector industrial high tech nobo na Aruba, particularmente usando technologia satelital.
Na 2022 e perspectiva pa crea un propio agencia espacial pa participa den investigacion cientifico, diseño di technologia espacial y actividad di centro di control tin un potencial pa diversifica nos economia.
E talentonan tey caba, falta e voluntad y disposicion pa tuma e rienda den pone esaki den marcha, y nos tin un reputacion favorabel caba den e ramo aki na nivel internacional.
Y comokiera cu ciencia y technologia espacial ta sirbi pa logra cumpli cu e obhetivonan di desaroyo sostenibel y nos tin un facultad na Universidad di Aruba pa Small Island Solutions through Science, Technology, Engineering and Mathematics, nos por hasta exporta y comparti e conocimento aki.