Home Corte Trio Bulgaro cu tabata skim bancomaticonan na Aruba condena na castigo di...

Trio Bulgaro cu tabata skim bancomaticonan na Aruba condena na castigo di prison

SHARE

ORANJESTAD – E tres Bulgaronan cu a worde deteni pa skimming, a wordo haya culpable y a wordo condena na castigo di prison.

ARUBA NATIVE por a compronde cu mientras cu Fiscal, durante tratamento di e caso a exigi 4 aña di prison pa tur tres, Hues a baha e castigo na 1 aña y 8 luna pa un di e Bulgaronan y 2 aña di prison pa e otro dos.

Luna pasa durante tratamento di e caso, Fiscal a bisa cu na Europa skimming ta hopi conoci, caminda hendenan ta bay otro paisnan pa haci esaki y horta placa for di bancomaticonan. El a bisa cu e ta haya legalmente proba cu a haci skimming riba bancomaticonan di CMB. Ariba camera di seguridad Polis a mira e trio ta haci cosnan. E copiamento di carchinan y despues traha esakinan ta wordo considera falsificacion di carchinan.

Fiscal a bisa cu na e cas unda e tres Bulgaronan a keda a haya aparatonan cu ta usa pa skimming y traha carchinan falso. Tin indicacion cu nan a copia carchinan na bancomatico pero no a traha carchinan falso.

Fiscal ta haya cu e grupo aki ta forma parti di un organizacion criminal. E ta haya cu tabatin un cooperacion largo entre nan pa haci e delito. E ta haya cu e trio tabata sa kico nan tabata haci. For di Europa nan tabatin e plan pa bin Aruba pa skimming. Tur esaki ta mustra cu nan forma parti di un organizacion criminal.

Fiscal a bisa cu Aruba ta depende hopi di turista y mas tanto turista Americano. Turistanan ta scoge Aruba no solamente pa su beachnan sino tambe pa e seguridad. Si skimming drenta na Aruba, esaki lo perhudica e isla su turismo y tambe banconan. Fiscal a tuma e grupo na malo.

Fiscal a exigi 4 aña di prison pa e grupo Bulgaro. Tambe el a exigi pa tur e aparatonan lo keda confisca.

Hues via video conference a dicta sentencia. E tres Bulgaronan tabata den un oficina na KIA mientras cu den sala di Corte tabata e abogado, Fiscal y Hues. Hues ta haya e trio culpable di complice di falsificacion di carchi di banco y forma parti di un organizacion criminal.

Hues a mustra cu e tres Bulgaronan a bin special Aruba cu aparatonan special pa pone den bancomaticonan pa copia carchi y falsifica carchinan. Skimming por causa dañonan serio na e victimanan. Hues a tuma nan na malo pa esaki.

Na opinion di Hues, e hecho cu e trio Bulgaro no a logra, no ta kita afor e seriedad di e caso. Hues a mustra cu M.D. a coopera cu investigacion y su rol tabata limita. Hues a condena M.D. na 1 aña y 8 luna di prison y G.S. y A.B. na 2 aña di prison. Tur e aparatonan cu nan a bin cun’e pa haci skimming lo keda confisca.