Fiyostraat – Diadomingo anochi pasa di 7’or polisnan un biaha mas mester a bolbe bay direccion Tarabana.
Den Fiyostraat un caya conoci pa polisnan un grupo lo a yega na un cas pa busca problema.
Un unidad di Playa y un K9 Unit a bay cu urgencia, mirando cu e grupo cu a yega e cas fuera di bisa mas cos a bay asina leu di bisa cu lo kima e cas.
Polisnan a dal bay zuid den Fiyostraat buscando e grupo. Poco mas pazuid di unda e problema tawata polisnan a topa cu un grupo di mucha na un cas, a haci nan algun pregunta pero a resulta cu no ta nan.
Y asina e patruya a sigui bay zuid den e caya, puntrando habitantenan si nan por a mira e grupo of sa algo di locual a pasa, pero ningun hende tawata sa algo.
Ultimo simannan ta varios biaha polisnan mester a bay Tarabana, pa problema entre grupo di hobennan y no ta mustra cu tin un final di esaki pronto.
