ORANJESTAD – Recientemente Minister di Salud Publico Sr. Dangui Oduber a comparti algun datos cu e la ricibi di Hospital. Manera ta conoci dia 20 di december ultimo Gobierno di Aruba a anuncia cu a detecta e variante nobo di COVID-19 na Aruba, esta e variante di Omicron. Despues di casi 1 luna cu ta colectando datos di e variante aki, awor tin mas conocimento, mas informacion, mas data riba e desaroyo y comportacion di e variante aki. Minister Oduber a menciona cu mescos cu na varios otro pais na mundo, e variante di Omicron ta duna tur indicacion di ta hopi mas contagioso pero menos peligroso.
Minister Oduber ta sigura pueblo cu no obstante e gran cantidad di casonan activo, e averahe di casonan nobo, e positivity rate halto, asina mes nos por a mantene nos capacidad na hospital. Tin presion pero nos ta manehando e, e mandatario a expresa. Tabata tin momento cu Aruba a yega na casi 5000 casonan activo, e averahe di casonan pa dia tabata 800 y e positivity rate na 65%.
Minister Oduber a señala cu un di e estadosticanan hopi interesante ta e edad averahe di e pashentnan interna na hospital y e cantidad averahe di dianan cu e pashentnan ta keda interna na hospital durante tur e olanan di 1 te cu 5.
Den ola number 1 e edad averahe di esnan interna den hospital tabata 59 aña y e cantidad averahe di dianan interna tabata 15 dia.
Den ola number 2 y 3 e edad averahe di esnan interna den hospital tabata 61 aña y e cantidad averahe di dianan interna tabata 10 dia.
Den ola number 4 e edad averahe di esnan interna den hospital tabata 58 aña y e cantidad averahe di dianan interna tabata 11 dia.
Den e ola number 5 cu ta esun actual cu Aruba ta pasando aden e edad averahe di pashentnan interna a bah ana 50 aña di edad. Locual ta remarcabel ta cu e averahe di e cantidad di dia cu e pashentnan ta keda interna a baha substancial na entre 3 cu 4 dia. E datos aki sigur ta hopi positivo y ta crea oportunidad pa bay den direccion di un Exit Strategy.
