Diamars ultimo, na CEDE di MEP, Lider di Partido MEP y Prome Minister di nos pais Evelyn Wever-Croes, a ricibi e certificado y medaya di e reconocemento internacional di COPPPAL, Medalla al Merito 2021. Esaki a wordo entrega na Lider di MEP door di señor Joe Koolman, Vice Presidente di COPPPAL pa region di Caribe y Secretario General Internacional pa Partido MEP. Den e XXXIX Plenaria recien di COPPPAL na Ciudad di Mexico cu a hiba e nomber di ‘Rudy Croes’ (dfm), señor Koolman a ricibi e reconocemento den nomber di Lider di MEP.
E reconocimento aki ta esun di mas halto di e organisacion “Honor al Mérito”, cu ta wordo duna na lidernan grandi pa nan contribucion balioso na politica di LatinoAmerica y Caribe. Cu votación unánime di 69 partidonan politico di 30 Pais di Latinoamericana y Caribe, a duna Lider di MEP e honor maximo aki. Lider di Partido MEP y Prome Minister di Aruba, hunto cu tres otro persona den e mundo político den America Latina y Caribe a ricibi e Merito aki. Movimiento Electoral di Pueblo, MEP ta orgulloso cu nos Lider y nos Minister Presidente Evelyn Wever-Croes a ser honra cu e reconocimento di mas halto aki.
Prome Minister desde su prome salida den politica 10 aña pasa, a mustra su amor pa nos pueblo y su potencial pa liderazgo. Esaki a wordo demostra den Partido MEP y tambe den gobernacion como Prome Minister di nos pais.
Despues di eleccion 2017, Evelyn Wever-Croes a bira e prome Minister President femenino di Aruba. Den e prome periodo di Gobierno di MEP, bou su liderazgo, a logra cosnan grandi pa Aruba, ta p’esey a gana eleccion y pueblo a expresa e gratitud den e votonan haciendo Premier Wever – Croes e prome votegetter femenino di Aruba.
Un lider, un hende muhe, cu ta gobernando su di 5 aña unda el a hereda un crisis financiero di e gobierno anterior y on top di esaki y corto despues a presenta e pio crisis cu Pais Aruba Aruba y mundo ta bibando aden, e crisis di Covid. Partido MEP ta gradici cu Aruba a haya e gobernante corecto na e momento corecto pa saca nos afo mas fuerte y resiliente di e crisis aki tambe. Den aña di Inversion y Oportunidadnan, nos tin e lider capas pa brinda nos pais e miho na bienestar di cada ciudadano. Aruba por sigui conta cu un Prome Minister cu ta lucha pa progreso y oportunidadnan pa nos tur.