Recientemente Minister di Asuntonan Economico, Comunicacion y Desaroyo Sostenibel, Mr. Geoffrey Wever den e reunion mensual cu Banco Central di Aruba, Aruba Hotel and Tourism Association, Aruba Tourism Authority, Aruba Airport Authority y Departamento di Asuntonan Economico, Comercio y Industria a ricibi e ultimo informacion over di e economia di Aruba. “E reunionnan aki ta sumamente importante pa por tin un bon bista di e desaroyo di nos economía”, segun Minister Wever.
Expectativanan pa e economia di Aruba ta positivo. Banco Central di Aruba den su “Economic Outlook December 2021” a presenta diferente scenarionan den cual ta premira un recuperacion di economia di Aruba den 2021. Segun e diferente scenarionan, e Producto Domestico Bruto (GDP), e indicador pa midi actividadnan economico, ta proyecta pa crece cu entre 11.3% y 16.7% nominal den 2021. Recuperacion economico ta premira pa continua tambe den 2022. Segun Banco Central di Aruba, economia di Aruba ta proyecta pa crece cu entre 6.8% y 17.3% nominal den 2022.
E proyeccion economico di Banco Central di Aruba ta den liña di expectativanan economico di Fondo Monetario Internacional y Departamento di Asuntonan Economico, Comercio y Industria. Segun e “World Economic Update October 2021”, Fondo Monetario Internacional ta premira un crecemento economico nominal di 14.7% den 2021 y 9.2% den 2022. Departamento di Asuntonan Economico, Comercio y Industria den su “Economic Outlook” di October 2021, ta proyecta un crecemento economico nominal di 13.6% den 2021 y 7.9% den 2022.
Segun Banco Central di Aruba, e recuperacion gradual den e sector turistico ta e motibo principal di crecemento economico den 2021. Esaki den combinacion cu programanan di apoyo financiero di gobierno di Aruba na individuonan y companianan, lo resulta den un subida di consumo priva. Pa 2022, Banco Central di Aruba ta primera continuacion di e recuperacion den e sector di turismo. Hunto cu un crecemento leve den inversionan priva, lo sigui stimula e recuperacion di economia di Aruba. E inflacion awor anticipa (un averahe di 12-luna) pa 2021 y 2022 ta proyecta di ta 0.5% y 2.7% respectivamente. E tasa di desempleo lo yega na un nivel di 9.5% den 2021, y ta proyecta pa baha te 7.7% den 2022.
Segun e relato di prensa di Banco Central di Aruba di 8 di december 2021, tanto e reservanan oficial y internacional a demostra di ta resiliente. E nivel di reservanan oficial y internacional a yega te na, respectivamente, Afl. 2.548,7 miyon y Afl. 2.923,3 miyon riba 24 di september 2021. Esaki ta mustra un subida di respectivamente Afl. 318,6 miyon y Afl.575,9 miyon.
E crecemento den e reservanan oficial y internacional ta primordialmente e resultado di fiansa di gobierno di Hulanda na gobierno di Aruba, y entradanan mas halto relata na turismo. Tambe segun e mesun relato, e cantidad di likides excesivo na banconan comercial a sigui crece mientras credito bancario ta baha.
Un motibo pa e crecemento di likides excesivo na banconan comercial ta e reduccion den e tasa di reserva obligatorio y cambio den e “prudential liquidity ratio” como medidanan di alivio riba tereno monetario y prudencial pa asina mitiga e efectonan di e pandemia di COVID-19. Tambe falta di demanda pa credito a contribui na e crecemento di likides excesivo na banconan comercial.