Riba diadiomingo 26 di October, e miembronan di Kiwanis Club of San Nicolas (KCSN) a reuni na Tierra de Sol pa nan conferencia di fin di aña Kiwanistico. E conferencia tawata tin como meta pa evalua e proyectonan di e club realisa den e aña anterior segun e vision di e plan strategico. Alaves e comisionnan a duna diferente presentacion tocante nan planes pa e siguiente aña kiwanistico y di ki manera specifico por sostene e muchanan y hobennan den nos comunidad mas efectivo.
Durante e conferencia tambe tawata tin un momento special unda a instala 4 miembro nobo. Ta trata di Esther Emerencia Gomes, Daphne Connor, Tricia van Heynigen y Charmin Angela Lewis, tur profesional den nan propio ramo cu boluntad y curason pa yuda nos muchanan.
Parti di e conferencia tambe tawata un family day. E muchanan di e miembronan a pasa un tempo placentero siñando con pa hunga golf bou di guia di e instructornan tremendo di Tierra del Sol Golf Club.
Kiwanis Club of San Nicolas kier a gradici tur e miembronan, tur e otro clubnan cu ta forma parti di e famia di Kiwanis na Aruba y Division 26, tur e stakeholders, sponsors y donors cu a kere den nos vision y cu a aporta na un of otro manera na beneficio di nos muchanan.
