Home Local Trahando riba e precondicionnan di un Codigo di Proteccion sostenibel y duradero:...

Trahando riba e precondicionnan di un Codigo di Proteccion sostenibel y duradero: 20 profesional a atende e prome dia di training di Supervisor di Codigo

SHARE

Dialuna 20 di september ultimo a inicia e prome dia di training di e prome dos grupo di e futuro Supervisornan di Codigo di Proteccion na edificio di JFK.  Codigo di Proteccion (Meldcode den nos Codigo Civil 1, articulo 243) a drenta na vigor desde 1 di april 2021. Codigo di Proteccion a cuminsa bou auspicio di Sociaal Crisis Plan y ta un plan di 5 paso, unda ta describi con un profesional den e sectornan: enseñansa, husticia, social y salud, mester anda cu e señalnan di (sospecho di) abuso di mucha. E 5 pasonan aki ta ancra den un Decreto Nacional. 

Supervisor di Codigo ta percura pa e implementacion, maneho y salvaguardia Codigo di Proteccion den e organisacion. E supervisor di Codigo ta traha pa henter e organisacion, ta e profesional riba e tereno di Codigo di Proteccion y ta conseha e directiva tocante e maneho relaciona cu Codigo. 

E training ta consisti di 3 dia intensivo y a opta pa parti e training aki den 6 dia (mitar dia parti mainta) pa asina e participantenan tin tempo suficiente pa prepara nan mes pa e sigiuente dianan di training. Un total di 20 profesional di diferente sector di social, enseñansa, husticia y salubridad publico ta participando na e training aki, cu ta bou guia y conhuntamente cu e instancia LVAK ( Landelijke Vereniging Aandachtsfunctionarissen Kindermishandeling). Cada grupo ta consisti di 10 profesional, p’asina por duna miho atencion na e contenido di e curso. Ta e propio Supervisor di Codigo, cu a termina nan curso den luna di juli, ta encarga pa duna e cursonan aki bek.  

Durante e promer dia di e training e trainers a enfoca riba e importancia di e rol di e Supervisor di Codigo y e competencianan cu mester tin, pa ehecuta e rol aki na un manera efectivo y eficiente. Mester remarca cu e ambiente mes den ambos grupo, tabata uno hopi positivo, educativo, trankilo, habri pa haci pregunta, espacio pa comparti experiencia, bon structura, bon balans entre teoria y tarea, diferente forma di traha y motivante. Na final a pidi tur participante pa duna feedback, p’asina por evalua e dia. Esaki a resulta den un feedback hopi positivo y resultado tabata cu e participantenan ta entusiama pa sigui cu e sigiuente dianan di training. 

E sigiuente dia di training lo tuma lugar dia 27 september na JFK y lo elabora mas riba e rol di Supervisor di Codigo y kico esaki ta encera pa tur instancia concerni.