Parlamentario Endy Croes ta splika cu ta prohibi pa lubida e fechorianan di AVP bou liderazgo di Mike Eman cual a tuma lugar entre 2010-2017. Otro x minister di AVP e siman aki ta den corte pa purba su di dos biaha pa scapa of baha su castigo. Manera ta conosi cu Paul Croes x minister di AVP y intimo amigo di Mike Eman a ricibi un castigo di 4 aña di prison mas 10 aña cu e no por sirbi Aruba den ningun funcion publico. Tur esaki paso Paul a wordo haña culpabel di bagamunderia , fraude y corupcion y tin un veredicto di Hues den eerste aanleg. Riba e sentencia aki tanto Paul Croes a apela pero alaves Ministerio Publico tambe a apela riba cierto fasenan di e veredicto aki. Desde februari 2019 a dura casi un aña y mei pa e caso aki presenta bek dilanti mesa berde pa asina (3) hues den Hoge Beroep repasa ful e caso aki scucha abogadonan, scucha fiscal di ministerio publico y hasta scucha esnan cu ya caba ta condena pa asina dicta dentro di 21 dia un sentencia nobo. Sea e condena ta keda mescos, sea e condena por aumenta o sea e condena por baha. Cu e conosemento cu nos tin riba e caso aki nunka pero nunka Paul Croes x minister di AVP por sali liber pero nos ta laga esaki den man di e (3) Huesnan pa huzga y duna e veredicto final.
/// Paul Croes a wordo condena den promer instancia hopi pisa:
E caso IBIS cu e sospechoso mayor Paul Croes x minister di AVP a tuma lugar na Januari 2019. Desde Maart 2017 ministerio publico, landsrecherche , RST, FIOT entre otro a drenta cas di Paul Croes momento cu e tabata minister di AVP den pleno poder. Na Augustus 2017 esta 5 luna despues y net 1 luna promer cu elecion autoridad a bolbe drenta cas di Paul Croes y a detene pa alrededor 90 dia. Investigacion pisa a conclui na masha hopi prueba con Paul na un manera di “gangster” a la mafia tabata mal usa su poder. Paul Croes y su oficina tabata cobra masha hopi plaka na un forma structural pa duna permiso. A haña hasta un schrift cuanto plaka Paul tabata ricibi pa cada permiso y con esakinan tabata wordo reparti. Paul y su chauffeur tabata shop na chinesnan tumando hopi bebida pornada a cambio di procesa permiso. Pues un practika masha mahos lokual e requisitor di Fiscal y Ministerio Publico tin poni den nan documentacion cu acusacionnan. Pues nos ta solamente ripiti lokual nos a lesa. Tur esakinan ta publico. Asina tin masha hopi actonan cu un hende decente y normal na su sano huicio nunka lo hasi. Pero de appel valt niet ver van de boom. Por mira otro casonan di corupcion manera caso Avestruz di Benny Sevinger y caso “wasmachine” di Mike Eman kende a ricibi sumanan di 50 mil dollar di mafiosonan cu a wordo condena na merca. Durante elecion 2021 recien por a tuma nota con publicamente Paul Croes kende tin condena di 4 aña di prison tabata campaña abiertamente hunto cu Mike Eman y pa Mike Eman esaki ta masha normal. Pues esaki ta e famia grandi di AVP y den nan “Statuut” di partido probablemente e palabranan criminal-fraude-corupcion-bandido y mafioso mester ta aparese pa nan ta actua asina normal y hasta pone sospechosonan riba lista y grita pa vota pa nan. Que vadis Aruba. Nos tin trabounan duro nos dilanti pa cambia mentalidad di nos pueblo. Reboot and Reset y core cu AVP pa semper pa e lugar aki por drecha.