Diahuebs pasa 26 di Augustus 2021, tabata un atardi di celebracion caminda a tuma lugar e firmamento di e acta di erfpacht pa Caribbean Town, Villas & Apartments, tereno di ongeveer 42.000 metro cuadra ubica na Eagle, Aruba.
Caribbean Town ta un proyecto di vivienda innovativo cu ta e match perfecto pa nos residente nan cu ta en busca di un cas moderno, sostenible y pagabel den Aruba su prome gated community dirigi exclusivamente na nos residente nan.
Den sala di conferencia na oficina di NewLeaf Notary, den presencia di Notario Señora Chamila Tromp, Director di DIP Señor Haime Croes, Sr. Rudy Tromp, kende ta autorisa pa firma den nomber di pais Aruba, y Ingeniero Victor Acosta, Director di YAMBO Developments 17A N.V., compania cu ta pertenece na PalmAruba Group, a firma e acta di erfpacht.
Cu e firmamento di e acta di erfpacht aki a wordo concretisa e proyecto di residencia Caribbean Town cu lo eleva e concepto di vivienda na Aruba y ta brinda residente nan e oportunidad di cumpra nan mesun vivienda cu e caracteristica nan di un proyecto turistico di luho, unda nan lo por disfruta di diferente ammenities manera entre otro community pool, playground, cancha di deporte, pets park, plaza, area comercial y mas.
Den e dia nan venidero YAMBO Developments lo anuncia su campanja di lansamento y lo estrena entre otro su website, cu lo brinda bishitante nan e oportunidad pa explora Caribbean Town virtualmente y selecta su apartamento, town house of cas di su preferencia na prijs y condicionan super faborabel!
