Durante conferencia di Prensa di Gobierno di Aruba diabierna 27 di augustus, Prome Minsiter Evelyn Wever-Croes a duna un declaracion cortico riba su preocupacionnan pa cu e situacion di Covid na Aruba encurashando comunidad di Aruba henter pa sigui coopera, cuida y vacuna principalmente cu e meta pa nos muchanan no wordo perhudica.
“Un siman pasa, den e oranan aki tabata e momentonan mas critico pa nos den e di 4 ola di Corono Virus cu ta tambe mas critico pa nos den henter e pandemia di Covid. Awor despues di un siman mi mester bisa cu cosnan ta mustra poco mas trankil. Nos capacidad na hospital, nos a mira cu a bira poco mas amplio. Aruba a haña extra personal manera nos tabata busca. Tur esakinan ta positivo pero lamentablemente nos Cuido Intensivo ta keda yen y nos ta perdiendo bida tur dia y no uno uno y esey tin mi hopi preocupa.
Den e fin di siman aki mi lo kier pidi un y tur, porfabor, ban sigui cuida. Respeta e reglanan y medidanan cu tin. E no ta facil of agradabel pero e ta pa bo bon y di bo famia”.
Nos ta bay evalua tur e medidanan entre dialuna cu diamars. Diaranson, 1 di september scol ta habri y nos muchanan por bay scol bek. Esey ta nos meta principal aworaki, pa nos muchanan no wordo perhudica. Pero pa nos muchanan por bay scol, nos mester nos adultonan pa coopera cu nos y cuida y sigui vacuna y asina nos hiba nos pais padilanti”, Prome Minister a expresa.