Home Politics Prome Minister Evelyn Wever-Croes: Hunto cu e acuerdo di gobernacion pa...

Prome Minister Evelyn Wever-Croes: Hunto cu e acuerdo di gobernacion pa Gabinete Wever-Croes II, FORMADOR TA ENTREGA E LISTA DI REPARTICION DI CARTERA NA GOBERNADOR DI ARUBA

SHARE

Diabierna 27 di augustus, Prome Minister Evelyn Wever-Croes, como Formador di e siguiente Gabinete, a haci su bishita regular na Gobernador di Aruba, Su Excelencia Alfonso Boekhoudt en conexion cu formacion di Gabinete Wever-Croes II. Ta asina cu Prome Minsiter desde cu el a haya e encargo pa ta Formador pa forma un Gobierno stabiel cu ta conta cu mayoria den Parlamento, a reuni cu diferente Stakeholders den nos comunidad y a bishita señor Gobernador regularmante pa duna un update di avansenan di formacion.

 

Diabierna mainta, Prome Minister a entrega na señor Gobernador e acuerdo di gobernacion pa nos siguiente Gobierno entre Partidonan MEP y RAIZ cu a wordo firma 19 di augustus ultimo. Hunto cu esaki, Prome Minister a entrega tambe e reparticion di cartenan entre Partidonan MEP y RAIZ.  E siguiente paso cu mester tuma luga awo ta e aprobacion pa e siguiente ministernan. 

 

Pa loke ta trata e reparticion di carteranan, Partidonan a dicidi cu lo keda na 8 ministerio manera e tawata ta den Gabinete Wever-Croes I. Partido MEP ta haya 6 ministerio y Partido Raiz ta haya 2 ministerio. E reparticion ta lo siguiente:

 

  1. Prome Minister, Asunto General, Innovacion, Organisacion Gubernamental, Infrastructura y Planificacion Teritorial, MEP. 
  2. Finansas y Cultura, MEP. 
  3. Husticia y Asuntonan Social, MEP. 
  4. Labor y Integracion, MEP. 
  5. Salud Publico, MEP. 
  6. Enseñansa y Deporte, MEP. 
  7. Asunto Economico, Comunicacion y Desaroyo Sostenibel, RAIZ 
  8. Integridad, Naturalesa, Transporte y Cuido di Grandinan, RAIZ

Esaki ta e reparticion den linianan grandi. Energia y Turismo ta cay bou di MEP. E motibo pa cua nan no ta inclui den e titulo ainda ta pasobra eigenlijk nan no tin un departamento di Gobierno pero si lo resorta bou di un ministerio. Agricultura y Sector Primario y Maneho di Desperdicio ta cay bou di RAIZ. Awo ta sigui e reparticion di e departamento y institutonan cu tambe lo mira cambionan. 

 

Tambe Formador a entrega na Gobernador, den cuadro di screening di ministernan, tur e documentacionnan pa asina Gobernador por cuminsa haci evaluacion pa despues por delibera e resultado. Ainda ta pendiente di algun documentacion cu ainda mester wordo ricibi pa asina e proceso aki tambe por wordo finalisa cu lo finalisa den huramentacion di minsiternan pa Gabinete Wever-Croes II. 

 

“Mi kier gradici tur esnan cu a yuda den e proceso aki tambe esnan cu a yuda tras di cortina. Mi ta gradici Partido RAIZ pa e forma con a delibera hunto durante e periodo di formacion. Mi tin un bon gevoel. Ora cu nos ta busca un partner pa yuda goberna nos pais na un manera stabiel y responsabel, nos no por a pidi pa un miho partner”, Prome Minister a termina enfatisando