Durante un conferencia di prensa, lider di fraccion di AVP den Parlamento, mr. Mike Eman a pidi atencion urgente pa e estado di deterioro cu e monumentonan Julianaschool y Beatrixschool ta aden.
E yamada di e parlamentario a wordo sostene pa diferente ex Directornan di Julianaschool y Beatrixschool y tambe ex docentenan di e dos scolnan historico aki.
Hunto cu Mike Eman a tuma palabra pa enfatisa e balor di e monumentonan aki ex irectornan di Juliana School, Dolfi Kock, mr. Eddy Croes, Harold Pereira y ex directornan di Beatrixschool Richard Frank y Maurits Taytelbaum y tambe tabata presente diferente docente cu antes a duna les na Beatrixschool y Julianaschool.
E lider di fraccion di AVP, mr. Mike Eman ta papia c’un curason special pa e edificionan aki, ya cu e mes como mucha a atende scol basico na Beatrixschool y enseñansa secundario na Julianschool, prome cu el a sigui su scol secundario mas halto y avansa na HAVO y VWO na Colegio Arubano.
Como parlamentario semper el a enfatisa e necesidad di conserva patrimonionan nacional y como lider di oposicion entre 2005 y 2009, Mike a lidera e lucha pa no bende Bestuurskantoor y mantene y rescata e edificio historico aki como Aruba su Centro di Gobernacion.
Como formado caba na 2009 el a duna contenido na su palabra y a habri e portanan di Bestuurskantoor bek, re-ubica trabaonan administrativo den e edificio di Bestuurskantoor – e temponan ey un edificio abandona y den un estado diplorabel.
Inmediatamente a inicia e proceso di rescate y restaurcion di Bestuurskantoor y den esaki a logra apoyo di boluntarionan cu den un forma impresionante a yuda cu trabao duro di dia y anochi pa haci e luga den un tempo record funcionabel atrobe.
Eman y su coleganan cu tabata parlamentario y a bira Minister, a laga riba su peticion, nan derecho riba overbrugging toelage cerca finansa di Aruba pa wordo inverti den renobacion di Bestuurskantoor.
E suma total di 5 minister cu tabata parlamentario cu derecho di overbrugging cu a worde laga pa gobierno, tabata riba 750.000 florin y su gabinete Mike Eman I y II a pone infasis grandi riba restauaracion di monumentonan.
Promer Minister Mike Eman su vision di rescate di e Centro di Gobernacion a haya un forma integral cu construccion di Cocolishi, Plaza Padu y restauracion y trabaonan di mantencion grandi di edificionan institucional rondona den e circulo ey, edificio monumental Rekenkamer, Stadhuis, Censo, Edificio di Gabinete de Gobernador y edificio di Staten.
Eman su vision di renovacion di centro di ciudad a inspira sector priva tambe pa inverti den restauracion di monumentonan priva.
Gobiernonan di signatura di su partido semper a duna prioridad na restaura y mantene patrimonionan nacional y danki na esey a logra restauracion di edificionan monumental manera ta e Ecury y Henriquez Complex caminda e impresionante Museo Arceologico y Monumentenbureau ta situa, Stadhuis y Censo (cas di Arends y Hotel Colombia), Watertorennan na Playa y San Nicolas, Edificio di Corte, Centro di Gobernacion Bestuurskantoor, Edificio di Rekenkamer antes Julianaschool, despues Biblioteca Nacional, edificio monumental Cosecha, e Kalkoven, e Watertank, Vuurtoren, cas di Gobernador, Nicolaas Store, scolnan monumental manera unda Universidadt ta estableci, La Salle College, Dominicus College, Rosa College, Sint Antonius College, Abraham de Veerschool, Sint Augustinus College, Santa Therecita y mucho mas.
Un cantidad impresionante di edificionan monumental a keda rescata y restaura bao liderazgo di Mike Eman y awe su preocupacion ta pa salba e edificionan monumental Juliana School y Beatrix School.
Scolnan cu a carga nomber di nos Reina Juliana y Reina Beatrix y a hunga un papel grandi den educacion di Aruba. Lo ta di lamenta si laga e monumentonan aki sigui deteriora y bay perdi y pa e motivo aki lider di fraccion di AVP mr. Mike Eman, a inicia hunto cu prominentenan den historia di enseñansa na Aruba, un lucha pa salba, rescata y restaura e monumentonan Julianaschool y Beatrixschool.