Home » Expedicion na Saba Bank pa Mehora Proteccion di Tiburon Tiger

Expedicion na Saba Bank pa Mehora Proteccion di Tiburon Tiger

by Admin
0 comment 85 views

Desde prome di augustus di aña 2021 un ekipo di investigado lo pasa un siman na Saba Bank pa investiga ciclo di bida di tiburon tiger. Investigadonan lo investiga e rutanan di migracion, na unda y ki tempo e tiburonnan ta broei pa por proteha nan miho dentro di Santuario di Tiburon y Mamifero Marino Yarari di Caribe Hulandes y eyfonan. Den e expedicion aki lo participa miembro di Saba Conservation Foundation (SCF), Nature Foundation St. Maarten (NFSXM), ), St. Eustatius National Parks (STENAPA), STINAPA Bonaire, Aruba National Parks Foundation (FPNA), Dutch Caribbean Nature Alliance (DCNA) y World Wildlife Fund for Nature the Netherlands (WWF-NL).

Tiger shark (Galeocerdo cuvier) swimming in the waters off Tiger Beach, Bahamas

 

Na aña 2016 Saba Conservation Foundation, Nature Foundation St. Maarten y Sharks for Kids a asocia como parti di e proyecto Save our Sharks di DCNA, financia pa Loteria Nacional di Codigo Postal di Hulanda.  Desde e tempo ey, marcamento di tiburon tiger via satelite ta tuma luga na Saba Bank y alrededor di Sint Maarten. Danki na e investigacionnan aki, nos sa awor cu e tiburonnan tiger den awa Hulandes ta biaha door di e cuenca di Caribe, y mayoria di e tiburonnan marca aki ta hembra sexualmente madura. Durante e expedicion venidero, e investigadonan tin como meta pa no solamente marca y rastrea mas tiburon tiger pa investiga mas a fondo e ciclo di bida, sino tambe nan lo midi nan pa sa si nan ta grandi y con grandi e crianan dentro di e tiburonnan tiger priña ta. Esaki lo yuda determina si Saba Bank di berdad ta un luga di cultivo pa e tiburonnan tiger, un di e principal metanan di e expedicion.

 

Otro meta ta pa wak pa unda e tiburonnan transfronterizo aki ta migra pa comprende miho e importancia di e Santuario di Tiburon y Mamiferos Marino di Yarari y pa proteha otro area geografico. Santuario Yarari a wordo estableci prome di september di aña 2015 y tin como meta  proteha e mamiferonan marino, tiburon y raya den e awanan di Boneiro, Saba y, desde september di 2018, Sint Eustatius. Colaboracion no solo entre e seis islanan di Caribe Hulandes, sino tambe entre e paisnan di  henter Gran Caribe  ta necesario pa proteha y conserva e especienan y e ecosistema esencial aki. Pa e motibo aki recientemente a forma Caribbean Shark Coalition pa colabora miho den henter e region di Gran Caribe.  

 

Cada aña dia 28 di juli ta celebra Dia Mundial di Conservacion di Naturalesa y ta reconoce cu un medio ambiente saludabel ta base di un sociedad stabiel y saludabel. Esaki ta inclui un ocean saludabel cu, sin duda ta depende di e tiburonnan. E tiburonnan ta anial di presa superior hopi grandi cu ta hunga un papel fundamental den mantenimento di ekilibrio den e ecosistema marino. E tiburonnan ta yuda mantene su poblacion di presa sano comiendo esnan debil y na mes momento ta afecta e distribucion di su presanan. Den ocean saludabel, e tiburonnan ta yuda mantene poblacion di pisca stabiel y rif di coral y tereno di yerba di lama saludabel, cual ta importante pa pesca y economia di e islanan.

 

E expedicion di investigacion di Tiburon Tiger ta coordina door di DCNA y ta wordo generosamente financia door di WWF-NL a traves di e Fondo di Biodiversidad y Loteria Nacional di Codigo Postal di Hulanda. Pa obtene mas informacion tocante expedicion di tiburon tiger priña, sigui e organisacionnan participante riba Facebook, Instagram of e website di DCNA DCNA’s website (https://dcnanature.org/news/).

 

__________________________________________________________________

 

Informacion di contacto pa entrevista: [email protected], [email protected] of telefon +599.717.5010

 

Tiburon tiger. Credito di e foto: Jarrett Corke WWF-Canada (derecho reserva)

 

Credito di e foto ©: Sami Kattan (derecho reserva)

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio