Croesstraat – Diadomingo den oranan di anochi polis a bay un adres den Croesstraat, unda un persona lo ta menasando hende cu machete.
Na yegada di varios patruya di Playa ya e persona no tawata na e sitio. Esnan na e sitio a confirma cu e informacion cu lo tin machete envolvi no ta cuadra.
Na e cas un habitante a splica polis cu berdad tawata tin un problema cu un yiu di criansa, unda cu e yiu lo a manda baranca ariba e cas.
Segun su “mayor” e mucha homber(20) lo a cuminsa usa droga y a bira mal cria. Pa e motibo eynan e no kier mas den e cas.
Debi cu ya pa basta tempo e tin problema cu su ruman cu si ta yiu biologico.
Polisnan a tira bista rond pa mira si nan ta haya e “yiu” pa papia cu ne pero no a logra esaki.
Por spera mas problema na e adres aki, tanten cu no atende cu e mucha homber aki.