Triangostraat, Tarabana: Diasabra algo despues di 8’or y mey, na altura di Citgo Oranjestad, polis a topa cu un scooter coriendo supuestamente basta iresponsabel riba caminda. Mesora e patruya lo a duna e motociclista ordo pa para, pero e motociclista no a respeta esaki y a sigui core. E la bay sigui bay pariba, direccion di Dakota.
E helicopter di Polis cu na e momento ey tabata patruyando a sigui e scooter for di halto, mientras e patruya di polis tabata siguiendo e scooter.
E motociclista a sigui core drenta Dakota despues di a pasa den Rondweg a bira drenta Mispelstraat despues a drenta den Tarabana y drenta cu e scooter den cura di cas na Triangostraat.
E polisnan cu tabata su tras, a yega na e cas, nan a drenta den e cura y enberdad a mira e scooter Gilera, staciona den e cura. Varios unidad di polis tabata na e sitio, e motociclista a keda deteni y transporta pa warda di Oranjestad.
E scooter no a wordo confisca pa motibo cu segun nos a compronde tur su papelnan ta na ordo, e motociclista a keda deteni pa motibo cu e no a respeta ordo di polis y a sigui core.
