Shaba:Diasabra den oranan di marduga un patruya di polis a topa un auto riba caminda, e dos personanan den e auto a keda deteni.
Toque de Queda ta cuminsa for di 10’or di anochi y ta caba 5’or di mainta, durante Toque de Queda, niun hende cu no tin un permiso of un autorisacion special por ta riba caya. Esaki no ta tocante solamente pa local, pero pa turistanan tambe.
Manera ta custumber di tur anochi, polis ta patruya riba e camindanan di Aruba, pa asina mantene ordo y siguridad riba nos isla. Mientras pueblo ta drumi, polis ta patruya, controla rond Aruba. Na mmento cu nan topa cu un auto riba caminda nan ta para esaki pa haci un control, si acaso e ocupantenan di e auto tin un permiso special pa ta riba caya durante TdQ.
Diasabra den oranan di marduga durante patruya, polisnan di Noord a topa cu un auto riba caminda di malmok. Mesora nan a para esaki tambe, pa controla si e ocupantenan tin un permiso pa ta riba caminda. E homber y ni e muher den e auto no por a demostra cu nan tin permiso pa ta riba caya durante TdQ, a resulta cu e dos personanan aki ta turista.
E dos turistanan a keda deteni pa viola TdQ y cu transportwagen di polis nan a wordo transporta pa Warda di Shaba, caminda nan lo mester presenta dilanti Sub Fiscal y despues cu nan ricibi nan boet pa viola e ley di Toque de Queda nan lo wordo laga bek den libertad.
