Home Police Driver di Forklift herida durante un delivery di plywood na Zumbo

Driver di Forklift herida durante un delivery di plywood na Zumbo

SHARE

Zumbo – Diasabra atardi algo pasa di 1’or polis t ambulance a bay un adres na Zumbo, unda un accidente cu forklift a tuma luga.

Na yegada di polis di leu nan a mira cu memey caminda tin un forklift di banda benta, y banda di dje un cabayero cu un paña wantando su cabes.

E accidente a sosode momento cu un compania a bay haci un delivery di algun plywood na dicho adres. Pero, e cas ta ariba un Sero y aki e problema a sinta.

Ora cu driver a trata na bay ariba cu tur e peso di e plywoodnan esaki a bin atras y bolter.

Durante cu esaki a sosode e driver a dal su cabes den e hero cu ta cage di e forklift heridando su mes parti patras di su cabes. 

Ariba caminda tur e hydraulic oil a basha despues cu e machine a bolter.

Doño di e compania a yega pa tuma nota di kiko a pasa y tawata bisa doño di e cas ariba e sero cu e la bisa na varios ocasion cu no ta deliver na e adres ey, debi na e peliger ora di subi.

E peliger segun e doño ta cu e peso y e brake di e forklift lo no wanta e subida.

Kiko a bay robes cu toch a bay haci e delivery no ta conoci.

Na yegada di ambulance mesora Paramediconan a baha y a move e driver di unda e tawata sinta, mirando cu rond di dje tawata tin e hydraulic oil basha y no ta bon segun e Paramedico. 

Polisnan na e sitio hunto cu Sra. Rasmijn Vocero Suplente di KPA a tuma nota di tur loke a pasa.

Na final Paramediconan a opta pa bay cu e homber herida pa ricibi mas tratamento na Hospital. 

Takelwagen a wordo pidi pa por bolter e Forklift bek y pa despues basha tera ariba e azeta cu a basha ariba caminda.