Hato: Dialuna den oranan di mainta a sosode un accident cu 4 auto envolvi y cu 5 hende herida riba e caminda di Hato un poco pabou di e rotonde di Tanki Flip, mesora a pidi pa presencia di polis y ambulance y materiaalwagen di brandweer pa motibo cu tin hende pega den auto.
Na yegada nan a bin topa enberdad cu 4 autonan y e 5 personanan herida, na e sitio nan a bin compronde cu tabata trata di dos accident. e prome accidente tabata entre un Nissan Sentra cu tabata bayendo direccion pariba y pa un motibo of otro a perde control y a bay dal semi frontal contra un Chevrolet Spark biniendo di pariba. E impacto tabata basta fuerte cu e Chevrolet Spark a bay cay den e greppel bandi pazuid di caminda. Un dama tabata manehando e Spark y den e auto e tabata tin 2 mucha cu ne. E Nissan Sentra tambe tabata wordo maneha pa un dama, ambos chauffeur y e dos muchanan den e Spark a keda herida.
E otro accidente tabata entre Nissan Murano y un Nissan Skyline. E dama chauffeur di e Nissan Murano tabata biniendo di pabou y a mira e accidente sosode su dilanti y a brake net na tempo, pero e Nissan Skyline biniendo su tras tambe maneha pa un dama no a logra brake na tempo y a bay dal tras di Nissan Murano. E dama den e Nissan Skyline tambe a keda herida.
Na yegada di ambulance mesora a saca e muchanan for di e Spark y a hibanan den ambulance, e chauffeur di e Spark tabata pega den e auto y materialwagen a yega y personal di brandweer mesora a cuminsa corta e porta di e Spark pa libera e dama chauffeur. E otro dos chauffeur di e Nissan Sentra y Nissan Skyline tambe tabata herida.
Despues di a libera e chauffeur di e Spark a transport’e pa hospital. En total 5 persona a wordo hiba cu ambulance pa hospital.
