Diaranson 24 di februari 2021, a marca un dia special pa Aruba en general y particularmente pa Museo Arqueologico Nacional Arubano (MANA). MANA ta para dilanti di un rosea financiero di suma importancia pa un museo di balor nacional riba tereno di herencia cultural, educacion y economia.
UNOCA a bin ta traha cu mira pa futuro y asina durante añanan a genera propio entrada, a crea fondonan specifico y door di reserva por a acumula un suma substancial pa e sector di cultura. Na 2016 UNOCA den combenio cu minister di cultura e tempo ey, a inyecta parti di e suma den 3 proyecto grandi: Plaza Betico Croes, Cas di Cultura y Mobies. E aña aki UNOCA un biaha mas den combenio cu minister di cultura ta inyecta den un otro proyecto grandi, esta Aruba su Museo Arquelogico.
MANA a habri su portanan pa publico na 2009. UNOCA e tempo ey tambe a duna sosten financiero pa realisa e proyecto aki. UNOCA a sostene e institucion di MANA desde su inicio. Varios investigacion y publicacion arkeologico di Aruba a haya sosten financiero di UNOCA.
Na momento cu Minister Xiomara Maduro a tuma encargo di Ministerio di Finansa, Asuntonan Economico y Cultura na 2018 a haci un inventarisacion di e situacion actual di e organisacionnan bou responsabilidad di dicho ministerio y a resalta cu MANA tabata tin dos aña cera. Tambe a constata cu a haci masha poco mantencion di e seis edificionan di MANA. Ta trata aki di entre otro di cuater edificio cu ta riba e Lista di Monumentonan Protegi di Aruba, pero cu lamentablemente ta den mal estado y cu mester restaura pronto.
Ademas a tuma nota cu por haci mas y mihor uzo di e edificionan y cu e exposicion permanente di MANA mester di inovacion y adaptacion. Entre otro investigacionnan recien a comproba cu e periodo Arcaico di Aruba, e periodo di e prome habitantenan, ta data mas o menos di 1500 aña prome cu Cristo. E hecho aki ta nifica cu MANA mester adapta informacion pa publico. Tambe e historia di e monumentonan y di famia Ecury mester haya mas atencion segun normanan profesional di awendia.
Mirando e papel importante cu museonan tin den e periodo cu nos ta yama ‘Post-Covid’, nos ta realisa cu nos mester inverti den nos museonan y MANA sigur ta uno cu nos mester duna prioridad. Nos mester percura pa MANA mantene su reconocimento como un di e miho museonan den Caribe y pa su portanan keda habri y sigui brinda servicio optimal na su bishitantenan.
Den di dos mitar di 2019 sr. Pancho Geerman a keda apunta como director interino na MANA. Bou su liderazgo por a mira cambionan positivo. Importante ta pa nos garantisa cu e cambionan cu a y ta bay tuma luga ta di un forma duradero. E aporte financiero cu UNOCA ta duna na MANA pa e proyecto “Manteniendo Herencia Bibo den Tempo”ta garantisa cu lo brinda mas y mihor producto na comunidad. Entre otro ta bay traha riba un exposicion cu lo enfoca riba e edificionan monumental y famia Ecury. Un exposicion nobo lo bay enfoca riba e desaroyo di placa di Aruba y su historia den tempo desde e prome habitantenan di Aruba te cu awendia.
E dos iniciativanan aki lo complementa e exposicion permanente actual di MANA. Renovacion di cierto edificionan tambe lo haya atencion. Di e forma aki MANA ta miho ekipa pa informa y educa nos propio hendenan y sostene enseñansa di nos hobennan. Ta e intencion tambe pa crea un centro di documentacion y investigacion na MANA, pa asina duna investigadonan mas espacio pa traha y pa logra crea y rescata mas documentacion posibel riba tereno di cultura.
Ministerio di Cultura y MANA, ta gradici di curason directiva di UNOCA, pa nan compromiso y e nocion di e importancia di nan sosten financiero pa MANA. E inversion aki ta un inversion na bienestar di Aruba su herencia cultural y Aruba su desaroyo general. UNOCA di su banda ta realisa cu e sosten financiero cu ta dunando, ta un parti chikito di locual di berdad mester pa tur e trabounan cu falta pa haci na MANA. Sin embargo UNOCA ta hopi orguyoso di por contribui na reforsa e museo importante aki pa pais Aruba y di e forma aki sostene nos herencia cultural, educacion y turismo.
