Diabierna ultimo Parlamento a reuni cu Banco Central y e departamento di MOT. Meta principal di e reunion tawata pa atende cu e cambionan den e ley pa combati labamanto di placa y financiamento di practicanan terorismo (Landsverodening voorkoming en bestrijding witwassen en terrorismefinanciering). Esaki ta un iniciativa mas cu Gabinete Wever-Croes ta ehecuta pa fortifica practicanan di bon gobernacion.
Financial Action Task Force
Ta asina cu constantemente mester percura pa leynan pa combati entre otro labamaneto di placa ta cumpli cu reglanan y tratadonan internacional cu ta wordo adapta a base di desaroyonan riba e tereno aki. Pa e motibo ey tin un entidad, asina yama “Financial Action Task Force”, cu ta duna recomendacion pa paisnan implementa cu e meta pa combati e tipo di crimen nan aki cada biaha na un forma mas efectivo. Fin di Augustus benidero Aruba como pais lo wordo evalua y p’esey ta asina importante pa e recomendacionnan cu a wordo duna door di e entidad aki, entre otro wordo ancra den ley.
Analisis di Banco Central
Den cuadro di e evaluacion di FATF, cu lo wordo conduci door di su entidad Caribense, CFATF, Banco Central a haci un “gap analysis” pa identifica deficiencia entre e recomendacionnan y nos leynan. Banco Central a señala algun deficiencia grave cu awor lo wordo atendi pa Gabinete Wever-Croes. Adaptacion di e ley aki ta sumamente importante pa Aruba no bira un paraiso pa laba placa of facilita financiamento di terorismo. Entre otro ta trata di cambionan cu tin di haber cu intercambio di informacion, exigencia estricto pa entidadnan ehecuta investigacion di nan cliente, reglamenta practicanan di “trustkantoren” mas mihor, y tambe amplia reglanan pa cu e “Ultimate Beneficial Owner” di companianan. E ultimo ta sumamente importante pa esnan cu mal intencion (criminalnan) pa no por sconde tras di structuranan di organisacion cu e intencion di keda anonimo.
Financial Intelligence Unit
Despues di e adaptacion di e ley aki, MOT lo yama Financial Intelligence Unit Aruba, FIU Aruba. E entidad aki lo haya un mandato hopi importante. E mandato aki ta pa por suspende transaccion nan dudoso a base di informacion cu e ta haya di entre otro instancianan internacional. Tambe ta importante cu FIU ta wordo apodera pa comparti informacion cu otro instancianan gubernamental, manera Censo, Dimas y Controleria General. Un cambio importante pa salvaguardia integridad di nos sector financiero, ta bay bira obligatorio cu companianan cu ta transferi placa, lo mester exigi datos di e persona cu ta ricibi e placa. Di e forma aki e “Financial Intelligence Unit” por haci analisisnan mucho mas profundo y alabes combati labamento di placa y financiamento di terorismo na un forma mas eficaz. E departamento aki, durante añanan a haya mas tarea. P’esey ta importante pa segura cu e tin suficiente medio financiero y personal capacita pa por cumpli cu e e responsabilidad cu e tin. Como Fraccion di MEP nos lo bay haci e ehercicio pa wak si por cumpli cu nan peticion di amplia e departamento cu 5 empleado mas. Nos ta kere esaki ta sumamente importante den cuadro di e vision pa segura integridad di gobernacion y nos sector financiero.
Pa Conclui
Nos ta wak bek riba un reunion sumamente fructifero den cual e profesionalnan a splica nos e necesidad pa bin cu e cambionan aki den ley pa combati y preveni labamento di placa y financiamento di terorismo. Pa por garantisa bon gobernacion na Aruba Gabinete Wever-Croes a introduci caba “Bureau Integriteit Aruba”, “Ombudsman”, ley pa reglamenta financiamento di partidonan politico, ehecuta un “National Integrity Scan”, y procesonan transparente ora ta trata destahonan publico. Y dentro di poco Parlamento lo atende cu e ley aki cual tambe ta forma parti di vision di nos Prome Minister sra. mr. Evelyn Wever-Croes.