For di 2018 tin palabracion haci cu Hulanda pa loke ta trata gasto di personal. Den CAFT su ultimo conseho riba presupuesto 2021 nan ta conclui cu Gabinete Wever-Croes ta bolbe cumpli cu e palabracion haci pa loke ta gasto di personal. Den comparacion cu presupuesto 2020 a conoce un reduccion di 11 miyon florin.
Cuenta anual ministerio di Prome Minister
Manera a trece dilanti tin palabracion haci cu Hulanda riba gasto di personal. Esaki ta pa evita cu e gastonan aki ta sigui crece. For di 2018 Prome Minister sra. mr. Evelyn Wever-Croes a introduci cuentanan anual di cada Ministerio. Den e documentonan aki por lesa bek cu gasto di personal na cada Ministerio tambe a baha. Na e ministerio di asuntonan general por ehempel ta trahando cu 22 persona cual ta nifica un rebaho di 9.4 miyon florin pa aña. Gobierno anterior tawata maneha e mesun Ministerio aki cu 125 persona.
Cada ministerio conoce un organogramo
E motibo dicon gastonan di personal por a wordo baha significantemente na e diferente Ministerionan ta pa motibo cu Prome Minister sra. mr. Evelyn Wever-Croes a introduci organogramonan pa e Ministerionan. Asina pues tin un diferencia grandi den maneho pa loke ta trata conseheronan. Asina nos por lesa cu e Ministerio di Prome Minister a conoce un reduccion di gasto di personal cu 85%, cu ta un averahe di 9.4 miyon. Esaki ta e resultado di a introduci un organogramo indicando cu cada ministerio por tin un maximo di 25 personal. Ademas tambe a baha gastonan di promocion y mercadeo.
Gastonan di personal
Den e conseho di CAFT riba presupuesto 2021 por lesa cu pa 2021 gasto di personal a wordo presupuesta na 431 miyon florin. Esaki ta un reduccion di 11 miyon florin cu presupuesto anterior y cu esaki Aruba ta cumpli cu e palabracion haci na 2018. A logra yega na e reduccion aki entre otro debi na ehecucion di e “beleidsplan verlaging personeelskosten” y un recorte den “overwerk”.
Pa conclui
E cuenta anual di asuntonan general ta disponibel online pa comunidad di Aruba. Por haya e Cuenta Anual 2020 di Ministerio di Asuntonan General riba https://issuu.com/gabinetewevercr…/docs/jaarverslag2020…
Pa loke ta e conseho di CAFT por haya esaki riba nan website www.cft.cw